«Реал» ва «Барселона» коронавирус сабаб 2020 йил охиригача қанча маблағдан қуруқ қолиши маълум бўлди

Испаниянинг «Реал» ва «Барселона» клублари коронавирус пандемияси сабаб қанча пул йўқотиши ҳисоблаб чиқилди.

Cadena SER маълумотларига кўра, мавсумнинг тўхтаб қолгани ва ўйинлар декабрга қадар бўш стадионларда ўтиши испан грандларини 300 дан 400 миллион еврогача миқдордаги пулдан қуруқ қолдиради.

Тахминий ҳисоб-китобларга кўра, «Реал» ва «Барселона» декабрга қадар чипталар савдосининг ўзидан 50 миллион йўқотади.

Агар жорий мавсум муддатидан аввал тўхталиб, кейингиси тўлиқ мухлисларсиз ўтадиган бўлса, испан футболи ҳомийлик шартномаларини инобатга олмаганда 1,6 миллиард евро йўқотади. Ҳомийлик келишувлари қўшилган тақдирда бу миқдор 1,9 миллиардга етади.

Таъкидланишича, энг ёмон сценарий рўй берадиган бўлса, баъзи клублар йўқ бўлиб кетиши ҳам мумкин.