Бухорода 27 апрель оқшомида кузатилган ёмғир аралаш кучли шамол оқибатида 41 киши тан жароҳати олгани ва бир киши ҳалок бўлгани ҳақида хабар берилган эди. Табиий офат қурбонига айланган фуқаронинг маҳалладоши унинг ўлими тафсилотларини маълум қилди.
Бош прокуратура матбуот хизматининг «Дарё»га хабар беришича, Бухоро шаҳрининг Хўжа Мушкин кўчасида яшаган, 1978 йилда туғилган Ўткир А. соат 21:30 атрофида уйига келаётганида кучли шамол оқибатида узилиб тушган электр симига эҳтиётсизлик билан урилиб, вафот этган.
Ўткир А. истиқомат қилган «Лоша» маҳалла фуқаролар йиғини раиси Мустафо Ҳамроевнинг «Дарё» мухбирига маълум қилишича, кучли шамол кўтарилган вақтда марҳум фуқаро ўғли билан бирга молларига ўт йиғиб келаётган бўлган, соат тахминан 21:30 да уларнинг устига дастлаб дарахт ағдарилган.
«Ўғил тез ҳаракат қилиб, чиқиб кетган, аммо Ўткир А. дарахт билан бирга узилиб тушган электр симининг бўйнига ўралашиб кетиши оқибатида воқеа жойида вафот этган», — деди «Лоша» маҳалласи раиси. Мустафо Ҳамроевнинг қўшимча қилишича, марҳум Ўткир А. асли механизатор, тўрт фарзанднинг отаси эди.
Бош прокуратура матбуот хизматининг қайд этишича, ҳозирда ушбу ҳолат юзасидан Бухоро шаҳар прокуратураси томонидан терговга қадар текширув ҳаракатлари олиб борилмоқда.
Маълумот учун, Президент Шавкат Мирзиёев Бухорода кучли шамол етказган талафотлар билан бевосита танишиш ва аҳоли билан мулоқот қилиш мақсадида 28 апрель куни Тошкентдан Бухорога жўнаб кетди.
Мавзуга доир:
- Бухорода кучли шамолдан сўнг 415 та автомобилга жиддий зарар етгани маълум қилинди
- Бухоро кучли шамолдан сўнг электр таъминотида энг катта талафот кўрган ҳудуд бўлиб турибди
- Бунақаси бўлмаган: Тошкентда ИИБ ходимлари автомобиль эгаларини ярим тунда шамол хавфидан огоҳлантирди (видео)
- Фото: Бухоронинг Олот тумани — 27 апрель шамолидан кейин
- Кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолди
- Видео: Бухоро ва Навоийга ёпирилган кучли шамол ва унинг оқибатлари
Изоҳ (0)