Бухоро вилоятида 27 апрель куни юз берган кучли шамол ҳудудда кучли талафотларга сабаб бўлгани ҳақида хабар берилган эди. Ўзбекистон Президенти Шавкат Мирзиёев ана шу талафотлар билан бевосита танишиш учун Тошкентдан Бухорога жўнаб кетди. Бу ҳақда Президент матбуот хизмати хабар берди.
«27 апрель куни республика ҳудудига кириб келган кучли шамол Бухоро, Навоий, Самарқанд ва Қашқадарё вилоятларида аҳоли ҳаёти, инфратузилма тармоқлари ва қишлоқ хўжалиги экинларига катта зарар етказган», — дейилади Президент матбуот хизмати хабарида.
Таъкидланишича, Ўзбекистон Республикаси Президенти Шавкат Мирзиёев ушбу табиий офат оқибатларини кўздан кечириш, зарур чора-тадбирларни белгилаш ҳамда аҳоли билан тўғридан-тўғри мулоқот қилиш мақсадида Бухоро вилоятига жўнаб кетган.
Эслатиб ўтамиз, Бухорода юз берган кучли шамол оқибатида бир киши ҳалок бўлди, 31 киши жароҳатланди. Кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолди. Бухоро кучли шамолдан сўнг электр таъминотида энг катта талафот кўрган ҳудуд бўлиб турибди. Бош прокуратура Бухородаги кучли шамол оқибатлари бўйича терговга қадар текширув ўтказмоқда.
Изоҳ (0)