Дональд Трамп унинг кун тартиби ва ишдаги одатлари ёзилган The New York Times’даги мақолани танқид қилди. Бу ҳақда у ўзининг Twitter’ида ёзиб қолдирди.
The New York Times’даги мақолада пандемия туфайли юзага келган инқирозда Трампни президентлик сайловларида ютиш имкониятлари кўпроқ ташвишлантираётгани, унинг фаолияти ОАВларда қандай ёритилаётганини диққат билан кузатаётгани баён этилган.
Шунингдек, кабинетида кам вақт ўтказиши, унинг ўрнига ўзининг шахсий ошхонаси ёки ётоқхонасида газеталардан парчалар ўқиб, телевизор томоша қилиб ўтириши ёзилган. Нашрнинг таъкидлашича, президент деярли ҳар куни ўтказилувчи брифингларга тайёргарлик кўрмайди ва журналистлар билан тортишади.
Трамп эса эрталабдан кечга ишлаши ва бир неча ойдан бери Оқ уйни тарк этмаётганини билдирган.
«Мен савдо келишувларини тузиш ва қуролли кучларни тиклаш учун ойлаб Оқ уйдан кетмасдан, эрта тонгдан то тунгача ишлайман. The New York Times’да эса менинг кун тартибим ва ишдаги одатларим ҳақида мен ҳақимда ҳеч нарса билмайдиган учинчи даражали журналист томонидан ёзилган ёлғон мақолани ўқияпман», — деб ёзган у.
Шунингдек, ўзининг 3,5 йиллик президентлик фаолиятида АҚШнинг қолган барча президентларига қараганда кўп ишларни амалга оширганини таъкидлаган. «Мени яқиндан билган одамлар мен тарихдаги энг меҳнаткаш президент эканлигимни айтишади», — деган Трамп.
Аввалроқ Трамп коронавирус сабаб бир ойдан буён Оқ уйдан чиқмаётганини айтганди. Фақат бир марта Нью-Йоркка йўл олган ҳарбий-тиббий кемани кузатишга бориб келганини таъкидлаганди.
Изоҳ (0)