Лондондаги Girardo & Co дилерлик маркази полициячиларнинг ноёб Ferrari машинасини сотувга қўйди. Тўрт ўринли Ferrari 250 GTE 1963 йилда Рим полициясида хизмат бошлаб, олти йил давомида жиноятчилар орасида афсона даражасига етган. Бу турдаги автомобилдан икки нусха яратилган бўлиб, ҳозирга қадар бир донаси сақланиб қолган, деб хабар беради Motor.
1960 йилларда Италияда деярли барча жиноятчилик ҳолатлари гумонланувчиларни қувиш билан якунланган. Жиноятчилар анча тез ҳаракатланувчи автомобилларга ўтириб қочганлиги сабабли полиция ҳам ортда қолмаслик учун Alfa Romeo 1900’ни бироз тезкорроқ Giulia 1600 седанига алмаштирган. Бироқ бу ҳам етарли бўлмаган. Офицер Армандо Спатафорнинг «учар бўлинмаси»дан жиноятчиликка қарши курашда полиция учун нима керак дея берилган саволга, улар қуйидагича жавоб қайтарган: «Ferrari’дан яхшироқ нима бўлиши мумкин?».
Спатафор ва яна уч нафар полиция ходими Маранеллога юборилиб, ҳайдовчилик маҳоратини ошириш курсида ўқиб қайтган. Дастур охирида Спатафорга vett. Polizia (полиция автомобили) номи остидаги янги — Ferrari 250 GTE 2+2 Series II машинасини кўрсатишган. Ferrari иккита бир хил машинани ишлаб чиқаргани маълум, бироқ бир неча ҳафтадан сўнг, жиноятчиларни қувиш вақтида машиналардан бири йўқ қилинган.
Спатафорнинг автомобили полиция сафида 1968 йилгача хизмат қилган. Полиция Ferrari’си ҳатто жиноятчилар орасида ҳам машҳурликка эришган. 1972 йилга қадар Ferrari 250 GTE 2+2 Рим полициясида хизмат кўрсатган, кейинроқ эса сотиб юборилган. Автомобилнинг янги эгаси ўғиллари билан биргаликда машинани оргинал ҳолатда сақлаб қолишга қарор қилиб, турли миллий ва Европа кўргазмаларида намойиш этиб келган.
1984 йилда Армандо Спатафор «ўзининг» Ferrari’си рулига ўтириб, Coppa delle Dolomiti тарихий пойгасида иштирок этган ва маррага иккинчи бўлиб етиб келган. 2000 йиллар бошида автомобиль полиция транспорти музейига топширилган.
Таъкидланишича, машина нархи харидорнинг сўровига кўра, маълум қилинади.
Изоҳ (0)