Ўзбекистонда 26 апрель, якшанба куни, коронавирусга чалинган беморларнинг 58 нафари тузалиб, реабилитацияга жўнатилди. Мамлакатда тузалганларнинг умумий сони 765 нафарга етди. Бу ҳақда Соғлиқни сақлаш вазирлиги хабар берди.
Тузалганларнинг 50 нафари Бухородан бўлиб, уларнинг 23 нафари вилоят юқумли касалликлар шифохонасидан, 27 нафари эса вилоят кўп тармоқли тиббиёт марказидан соғайиб чиққан.
Қайд этилишича, уларнинг 43 нафари эркак, 7 нафари аёл бўлиб, 44 нафари Россиядан, 6 нафари эса Туркиядан чартер рейслар орқали Бухорога олиб келинган ва карантинга олинган. Коронавирус инфекцияси тасдиқлангач, ихтисослашган шифохонага жойлаштирилган.
Беморларнинг 9 нафари Самарқанд вилоятидан, Бухоро ва Қашқадарё вилоятларидан 8 нафардан, 5 нафари Андижон вилоятидан, Қорақалпоғистон Республикаси ва Наманган вилоятидан 4 нафардан, 3 нафар Тошкент шаҳридан бўлса, Хоразм, Фарғона ва Сирдарё вилоятларидан 2 нафардан, Жиззах, Тошкент ва Сурхондарё вилоятларидан 1 нафардан. Улар орасида энг ёши каттаси 59 ёшда бўлса, энг ёши кичиги 5 ёшли қизалоқ.
Тошкентда эса Эпидемиология, микробиология ва юқумли касалликлар илмий-текшириш институти клиникасида 5 нафар, Тошкент тиббиёт академияси кўп тармоқли клиникасида 1 нафар бемор буткул соғайган.
Эпидемиология, микробиология ва юқумли касалликлар илмий-текшириш институти клиникасида тузалганларнинг 2 нафари Тошкент шаҳридан бўлса, қолган 3 нафари эса Сирдарё, Сурхондарё ва Тошкент вилоятидан. Уларнинг 2 нафари Москва—Тошкент йўналишида чартер рейс орқали келган. Қолган 3 нафари коронавирус инфекциясига чалинган беморлар билан мулоқот орқали касалликни юқтириб олган. Беморлардан 4 нафари эркак, 1 нафари аёл. Улар орасида энг ёши каттаси 53 ёшда бўлса, энг ёши кичиги 26 ёшда.
Тошкент тиббиёт академияси кўп тармоқли клиникасида соғайган 42 ёшли бемор (эркак) Тошкент шаҳридан бўлиб, коронавирус инфекциясига чалинган беморлар билан мулоқот орқали касалликни юқтириб олган.
Шунингдек, пойтахтдаги 3-сонли туғруқ мажмуасида илк бор коронавирусга чалинган 2 нафар бемор: яқинда фарзандли бўлган она ҳамда ҳомиладор аёл ҳам соғайиб чиққан.
Биринчи бемор аёл 38 ёшда бўлиб, Наманган шаҳридан. 2020 йил 31 март куни Тошкент шаҳар перинатал марказида фарзандли бўлган. Онада коронавирус инфекцияси аниқлангач, 3-сонли туғруқ мажмуасига олиб келинган. Унинг фарзандида эса коронавирус инфекцияси аниқланмаган.
Ҳомиладор аёл эса 28 ёшда бўлиб, Самарқанд шаҳридан. У 26 март куни Туркиядан Тошкентга келган ва карантинга олинган. Коронавирус инфекцияси аниқлангач, 3-сонли туғруқ мажмуасига олиб келинган. Айни пайтда 32 ҳафталик ҳомиласи ривожланмоқда.
Шундай қилиб, 26 апрель соат 17:50 ҳолатига кўра, Ўзбекистонда коронавирус инфекциясидан бутунлай соғайган беморлар сони 765 нафарни ташкил этмоқда.
Ўзбекистонда 26 апрель соат 18:00 ҳолатига кўра, коронавирус инфекциясини юқтириб олганлар сони 4 кишига кўпайиб, 1869 нафарга етди.
Изоҳ (0)