Ўзбекистонда мавжуд вирусологик лабораторияларда 25 апрелнинг ўзида 8 579 та, шу вақтга қадар эса 242 536 кишида коронавирус тести ўтказилди. Бу ҳақда Санитария-эпидемиологик осойишталик агентлиги директори ўринбосари Баҳром Алматов АОКА ҳузуридаги штабда ўтказилган брифингда маълум қилди.
Алматовнинг айтишича, бугунги кунда эпидемик вазият нохуш бўлган ҳудудлардан келган ва беморлар билан мулоқотда бўлган 81 079 нафар фуқаро саломатлиги устидан тиббий назорат давом этмоқда.
Уй шароитида 62 825 нафар, стационар шароитда эса 18 254 киши карантинга олинган. Шу вақтга қадар 207 336 нафар (уй шароитида 174 441 нафар, стационар шароитида 32 895 нафар) фуқаро карантиндан чиқарилди.
Эслатиб ўтамиз, Коронавирусга қарши кураш штаби аъзоси Ҳабибулла Оқилов яқин орада коронавирус учун тест ўтказиш ярим миллионга етказилишини маълум қилганди.
Санитария-эпидемиология назорати давлат инспекцияси бошлиғи Нурмат Отабеков Ўзбекистонда коронавирусга антитана борлигини билиш учун тест топшириш мумкинлигини, лаборатория ташхиси асосан полимераз занжир реакцияси (ПЗР) усулида амалга оширилаётганини айтганди.
Маълумот учун, Ўзбекистонда 26 апрель соат 18:00 ҳолатига кўра, коронавирус инфекциясини юқтириб олганлар сони 1869 нафарга етди. Мамлакатда 15 мартдан буён коронавирусга чалинган беморларнинг саккиз нафари вафот этди, 789 нафари эса соғайиб, реабилитацияга олинди.
Изоҳ (0)