«Челси» афсонаси Жанфранко Золанинг лондонликлар клубидаги энг чиройли 10 та голи (видео)

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда дунёнинг энг кучли футболчилари томонидан урилган энг сара голларни тақдим этиб боради. Ушбу лойиҳанинг навбатдаги сонида Италия терма жамоаси ва «Челси» клуби ҳужумчиси Жанфранко Золанинг лондонликлар сафидаги энг чиройли голлари тақдим этилади.

Жанфранко Зола 1996 йилнинг ноябрида Руд Гуллит бошқарувидаги «Челси» жамоасига келиб қўшилади. Карло Анчелоттининг «Парма»сида захирада қолиб кетаётган ўйинчи Англия чемпионатида тезда ўзини кўрсатади ва лондонликларнинг асосий футболчисига айланади. Италиялик футболчи «Челси» билан Англия Кубоги, Лига Кубоги ва Кубок эгалари Кубогида зафар қучади. Зола лондонликлар сафидаги сўнгги, 2002/03 йилги мавсумда жамоанинг мавсумдаги энг яхши ўйинчиси деб топилади. Зола 2018/19 йилги мавсумда «Челси»ни бошқариб борган Маурицио Саррига ассистентлик қилганди.

10-ўрин. 1997 йил | «Челси»—«Ливерпуль» 4:2

Дастлаб «Ливерпуль» иккита тўп киритган ҳолда олдинга ўтиб олади, бироқ бунга майдон эгалари тўртта тўп билан жавоб қайтаради. Зола эса ўйинда мувозанатни тиклаган голга муаллиф бўлади.

9-ўрин. 2001 йил | «Челси»—«Ньюкасл» 1:1

2001/02 йилги мавсумнинг илк турида Жанфранко узоқ масофадан аниқ зарба йўллаган ҳолда лондонликларнинг ягона голига муаллиф бўлганди

8-ўрин. 2000 йил | «Челси»—«Барселона» 3:1

Чемпионлар Лигаси ¼ финалининг дастлабки ўйинида Зола жарима зарбасини муваффақиятли ижро этган ҳолда ҳисобни очган ва жамоасининг ғалабасига ҳисса қўшганди.

7-ўрин. 1997 йил | «Челси»—«Манчестер Юнайтед» 1:1

Италиялик футболчи манкунианликлар ҳимоясини кўрдим демай, дарвозанинг яқин бурчагини моҳирлик билан нишонга олмоқда.

6-ўрин. 1996 йил | «Челси»—«Вест Ҳэм» 3:1

Золанинг мазкур голи Лондон дербисида «кўклар»нинг ғалабасида муҳим рол ўйнаганди.

5-ўрин. 1997 йил | «Уимблдон»—«Челси» 0:1

Жанфранко тўпни ажойиб тарзда тўхтатиб олган ҳолда учрашувдаги ягони тўпни киритган палла.

4-ўрин. 1998 йил | «Челси»—«Штутгарт» 1:0

Кубок эгалари Кубогининг финалида Зола ушбу голи орқали лондонликларга чемпионликни олиб келганди. Жароҳат сабаб ўйинни асосий таркибда бошлай олмаган италиялик иқтидор эгаси захирадан майдонга тушади ва 21 сония ўтиб ушбу гол муаллифига айланади.

3-ўрин. 2003 йил | «Челси»—«Тоттенҳэм» 1:1

Зола жаримадан заргарона зарба йўллаб, дарвозанинг тўққизлик бурчагини аниқ нишонга олганди.

2-ўрин. 2003 йил | «Челси»—«Эвертон» 4:1

Жанфранко жарима майдони ташқарисида тўпга тўхтатмасдан зарба берган ҳолда мерсисайдликлар посбонини доғда қолдирганди.

1-ўрин. 2002 йил | «Челси»—«Норвич» 4:0

Зола Англия Кубоги доирасидаги баҳсда антиқа гол орқали жамоасининг йирик ғалабасига ҳисса қўшганди.