Губернатор Эндрю Куомонинг тахминларга кўра, коронавирус Нью-Йоркка Хитойдан эмас, Италиядан келган. Бу ҳақда The New York Times хабар берди.
Шимоли-шарқий университет тадқиқотларига кўра, Нью-Йорк аҳолисининг мингдан ортиғи 1 март куни — штатда илк бемор қайд этилганидан олдин касалликка чалинган бўлиши мумкин. Куомонинг фикрича, COVID-19’нинг минтақада пайдо бўлиш манбайи — Италия.
Губернаторнинг таъкидлашича, АҚШ президенти Дональд Трамп коронавирус хавфи сабаб Хитой билан алоқани февраль ойидаёқ тўхтатган, бироқ Европадан келувчилар март ойидагина чекланган. Куомонинг сўзларига кўра, бу вақтга келиб вирус мамлакат ҳудуди бўйлаб кенг тарқалиб бўлган.
Шунингдек, у январь ва февралда, коронавирус ҳақидаги ваҳимали янгиликлар тарқала бошлагач, Европадан Нью-Йорк ва Нью-Жерси аэропортларига 2,2 миллион одам бемалол кириб келганини билдирди. Куомонинг қўшимча қилишича, штатдаги коронавирус статистикаси ижобий натижаларни кўрсатмоқда.
Сўнгги вақтда коронавирус аниқланган 422 бемор вафот этган бўлиб, бу 31 мартдан буён кузатилган энг паст кўрсаткич ҳисобланади. Бундан ташқари, кетма-кет 10-кун шифохонларга мурожаат қилаётган беморлар сони камаймоқда. Бироқ штат губернаторининг таъкидлашича, штатлардан чеклов чораларини олиб ташлашга ҳали эрта.
Аввалроқ АҚШда ўтган бир сутка ичида 3,3 мингдан ортиқ бемор коронавирус оқибатида вафот этгани ҳақида хабар берилганди. Америкалик олимларнинг сўзларига кўра, коронавирусга чалинганлар сони расмий рақамлардан ўн баравар кўп бўлиши мумкин.
Эслатиб ўтамиз, АҚШ президенти Дональд Трамп мамлакатдаги ҳар бир штат ҳукумати ўз минтақасидаги шароитдан келиб чиқиб, коронавирус сабаб жорий этилган чекловларни бекор қилиш бўйича қарор қабул қилиши кераклигини маълум қилган.
Изоҳ (0)