Италияда ўтган бир сутка ичида 3 мингга яқин бемор коронавирусдан тузалишга муваффақ бўлди. Бу ҳақда мамлакат Фуқаролик мудофааси хизмати бошлиғи Анжело Борреллига таяниб, АNSА агентлиги хабар берди.
Борреллининг таъкидлашича, ушбу кўрсаткич мамлакатда пандемия бошланганидан буён рекорд ҳисобланади. Шу билан бирга, ўтган бир сутка ичида Италияда яна 2,6 минг кишида коронавирус аниқланган.
«Бугунги рақамлар алоҳида далда берадиган. Соғайганлар ва шифохонадан жавоб берилганлар сони касалликка янги чалинганлар сонидан кўпроқ», — дейди Боррелли.
Таъкидланишича, Италияда коронавирус билан касалланганлар сони 189,9 минг кишидан ошган бўлиб, уларнинг 57,5 минг нафари соғайишга муваффақ бўлган. Шунингдек, 25,5 минг бемор вафот этган. Мамлакатда COVID-19 билан касалланиш бўйича янги ҳолатлар кетма-кет тўртинчи кун камайишда давом этмоқда.
Сўнгги маълумотларга кўра, Ўзбекистонда коронавирусдан тузалганлар сони 563 нафарга етди. Эслатиб ўтамиз, Ўзбекистонда 24 апрель соат 10:00 ҳолатига кўра коронавирус инфекциясини юқтириб олиш билан боғлиқ жами ҳолатлар сони 1778 тани ташкил этмоқда. Беморларнинг етти нафари вафот этган.
Изоҳ (0)