Вадим Абрамов Осиё Кубоги—2011 да нима сабабдан Одил Аҳмедовни марказий ҳимояда ўйнатганини айтди

Ўзбекистон терма жамоаси бош мураббийи Вадим Абрамов Қатар майдонларида ўтган Осиё Кубоги—2011 мусобақасида ярим ҳимоячи Одил Аҳмедовни нима сабабдан марказий ҳимояга қўйганини айтди.

«Ўша вақтда биринчи пасни аниқ берадиган ҳимоячи йўқ эди, шунинг учун Одилни ўйнатишга мажбур бўлганман. Аҳмедов мусобақадан олдин ёнимга келди. Марказий ҳимояда жой бўлмаса захирада ўтиришга тайёр экани ва бундан хафа бўлмаслигини айтди. Мен эса гап бу ерда эмаслигини Германия мисолида унга тушунтирдим.

Германия уч бор Жаҳон Чемпионига айланган мусобақаларни эслаймиз: бирида Франц Беккенбауэр ярим ҳимоядан марказий ҳимояга олинади. Иккинчисида жамоанинг энг ёрқин ярим ҳимоячиларидан бири Маттиас Заммер марказий ҳимоячига айлантирилади. Учинчисида плеймекер Лотар Маттеусни марказий ҳимояга олишади. Шуларни айтиб унга тушунтирдим ва Одил ҳимояда ўйнашга рози бўлди.

Ўртада биргина тушунмовчилик бор. Менга маълум бўлишича, ўша ерда кимдир Австралияга қарши ўйин олдидан унга «сен ярим ҳимоячисан ва ҳужумга ўтишинг керак», деган. У олдинга кўп ўтиб кетди ва бунинг ортидан бизда муаммолар пайдо бўлди. Агар адашган бўлсам, унинг ўзи тўғирлаши мумкин», — дейди Абрамов.

«Тезкор студия» дастуридаги суҳбат пайтида Одил Аҳмедов ҳам ўша вазиятни ёдга олди.

«Мусобақа арафасидаги ўртоқлик ўйинларида мени марказий ҳимояда синаб кўра бошлашди. Шундан кейин Абрамов юқорида таъкидлаган суҳбат жараёни бўлиб ўтди.

Австралияга қарши ўйиндан олдин менга ҳеч ким ярим ҳимоячи эканим ва ҳужумга ўтишим кераклигини айтмаган. Шунчаки, рақиб ўз вазиятидан фойдаланиб гол урганидан сўнг, ҳеч биримиз ютқазишни хоҳламаганмиз. Ғалаба қозонишни истаганман. Шу сабаб кўпроқ олдинга ўтиб ҳужумга ёрдам беришга интилганман ва Азиз Ҳайдаров билан алмашиб ҳаракат қилганмиз», — дейди Одил Аҳмедов.