Роберт Паттинсон иштирокидаги «Бэтмен»нинг тақдимоти коронавирус туфайли 2021 йилнинг кузига қолдирилди

Warner Bros. киностудияси коронавирус пандемияси туфайли бир неча фильмлар тақдимотини қолдирди, деб ёзади Deadline.

Шундай қилиб, Роберт Паттинсон иштирокидаги янги «Бэтмен»нинг 2021 йилнинг июнига мўлжалланган тақдимоти 2021 йилнинг 1 октябрига қолдирилди. Бу студиянинг март ойи ўртасида коронавирус туфайли суратга олиш жараёнларини тўхтатгани билан боғлиқ.

Режиссёр Мэтт Ривзнинг сўзларига кўра, янги фильмда томошабинлар Бэтменнинг «қора» тарихини кўради. «Янги ‘Бэтмен’да детектив аввалгиларидан кўп. ‘Бэтмен’ дунёдаги энг буюк детектив бўлиши керак, ҳатто сценарий унинг атрофида қурилмаса ҳам», — дейди Ривз.

Фильмда Роберт Паттинсондан ташқари Жеффри Райт, Зои Кравиц ва Колин Фаррелл рол ижро этади.

Шунингдек, Warner Bros. «Флэш» фильми тақдимоти 2022 йилнинг 3 июнига, «Шазам» фильми тақдимоти эса 2022 йилнинг 4 ноябрига қолдирилганини ҳам маълум қилган.