Мetaflix YouTube канали муаллифлари Голливуд актёри Кристиан Бэйл карьераси давомида неча килограммга семириб, озганини аниқлашга киришди, деб ёзади «Kinopoisk.ru».
Актёрнинг вазни ўзгарган асосий лойиҳаларни кўздан кечириб, аниқланишича, Бэйл 1994 йилда «Кичкина аёллар»да кўриниш берганидан ҳозирга қадар 274 килограмм атрофида вазн ташлаб, кейин яна йиғган.
Вазндаги кескин ўзгариш 2000 йилларнинг бошларида қайд этилган. «Машинист» триллерида Бэйл қаҳрамони 56 килограмм вазнга эга бўлган, кейин эса «Бетмен: Ибтидо» фильмида суратга тушган. Бу фильм учун актёр вазн йиғишга мажбур бўлган. Натижада икки фильм ўртасидаги фарқ бир йилда 43 килограммни ташкил этган.
Худди шундай ҳолат 2010 йилларнинг охирида ҳам такрорланган. Бэйл «Мансаб» фильмидаги Дик Чейн образидан кейин «Ford Ferrari’га қарши» фильмидаги пойгачи Кен Майлз образи учун тез озишига тўғри келган.
Бэйл интервьюларидан бирида вазн ташлаш, биринчи навбатда ёлғизлик билан боғлиқ эканлигини айтиб ўтган. Чунки тез-тез дўстлари билан кўришиб турганда кўп овқат тановул қилишга тўғри келади. Бундай вазиятларда агар назорат йўлга қўйилмаса, кўп нарса еб юбориш ва ортиқча вазн тўплаш мумкин.
Яқин келажакда Бэйл «Тор: Севги ва чақмоқ» блокбастери ҳамда Дэвид О.Рассел ҳақидаги фильмда суратга тушишни режалаштирмоқда.
Маълумот учун, 46 ёшли Кристиан Бэйл «Қора рицар», «Ford Ferrari’га қарши», «Бетмен: Ибтидо» каби фильмлардаги образлари билан ўзбек томошабинларига танилган.
Изоҳ (0)