Владимир Путин Россия соғлиқни сақлаш вазири Михаил Мурашкога коронавирус вакцинасини рўйхатдан ўтказиш учун зарур бўлган барча жараёнларни тезлаштиришни буюрди. Бу ҳақда у мамлакатдаги санитария-эпидемиологик вазиятга бағишланган йиғилишда маълум қилган.
Йиғилишда иштирок этган Гамалея номидаги эпидемиология ва микробиология илмий-тадқиқот маркази директори Александр Гинцбургнинг таъкидлашича, мутахассислар тахминан 15 июнга келиб ушбу препаратни давлат рўйхатидан ўтказиш имкониятига эга бўлади.
Унинг айтишича, айни пайтда у клиник текширувларга қадар ҳайвонларда синовдан ўтказилмоқда. Ишчи режага кўра, шифокорлар клиник текширувларга қадар тадқиқотларни 31 майгача якунлашни режалаштирмоқда, 1 июндан эса препаратни клиник синовдан ўтказиш бошланади.
Аввалроқ Россияда коронавирусга қарши кураш учун 3 турдаги дори ишлаб чиқилиб, COVID-19’ни даволашда фойдаланиш мумкин бўлган препарат номи эълон қилинганди. Айни пайтда коронавирус қарши вакцина Россиядан ташқари яна бир қатор давлатлар, жумладан, АҚШ, Франция, Буюк Британия ва Хитойда ишлаб чиқилмоқда.
Дунёда биринчи бўлиб COVID-19 коронавирусига қарши вакцина синовидан ўтказилган одам америкалик Женнифер Халлер бўлди. Вакцина mRNA-1273 деб номланиб, у Сиэтлдаги Аллергия ва юқумли касалликлар миллий институтида яратилган. Синов учун 45 нафар кўнгилли танлаб олинган. Уларнинг ҳар бирига 28 кун давомида бир хил дозада 2 тадан инъекция қилинади ва улар 2021 йилнинг баҳорига қадар кузатувда бўлади.
Март ойи охирларида Британиядаги hVIVO тадқиқот гуруҳининг коронавирусга қарши вакцина ишлаб чиқиш ва шунга ўхшаш вирусни юқтириш дастурида иштирок этишга 20 мингдан ортиқ одам рози бўлган. 6 апрель куни Туркияда коронавирусга қарши вакцина ҳайвонларда муваффақиятли тест қилинган.
Изоҳ (0)