Тошкент шаҳридаги Эпидемиология, микробиология ва юқумли касалликлар илмий-текшириш институти клиникасида коронавирус инфекциясига чалинган навбатдаги 21 нафар бемор буткул соғайди. Улар 21 апрель, сешанба куни, Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди. Бу ҳақда Соғлиқни сақлаш вазирлиги хабар берди.
Фото: «Дарё»
Шифо топганларнинг 8 нафари Россиядан Тошкентга келгач «Сокол» оромгоҳига карантинга олинган, 1 нафари Франциядан, яна 1 нафари эса БААнинг Дубай шаҳридан келган. Уларда коронавирус инфекцияси аниқлангач Эпидемиология, микробиология ва юқумли касалликлари илмий-текшириш институти клиникасига ётқизилган. Қолган 11 киши коронавирус инфекциясига чалинган беморлар билан мулоқот орқали касалликни ютириб олган.
Беморларнинг 11 нафари эркак, 10 нафари аёл. 13 нафари Тошкент шаҳрида яшайди. Самарқанд ва Фарғона вилоятларидан 2 нафардан, Навоий, Хоразм ва Тошкент вилоятларидан эса 1 нафардан бемор тузалишга муваффақ бўлган. Улар орасида энг каттаси 67 ёшда бўлса, энг кичиги 11 ёшда. Сўнгги текширувлар ушбу беморларда инфекция йўқлигини кўрсатди.
Ушбу клиникада шу пайтга қадар 50 нафар бемор коронавирусдан тузалди.
Шунингдек, Тошкент тиббиёт академияси кўп тармоқли клиникасида ҳам коронавирус инфекциясига чалинган навбатдаги 10 нафар бемор буткул соғайиб, 21 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Соғайганларнинг 3 нафари Москва—Тошкент , 1 нафари Истанбул—Тошкент йўналишида чартер рейс орқали келган ва карантинга олинган. Қолган 6 киши эса коронавирус инфекциясига чалинган беморлар билан мулоқот орқали касалликни юқтириб олган.
Беморларнинг 5 нафари эркак, 5 нафари аёл. 9 нафари Тошкент шаҳрида яшайди, 1 нафари Хоразм вилоятидан. Улар орасида энг каттаси 62 ёшда бўлса, энг кичиги 11 ёшда.
Тошкент тиббиёт академияси кўп тармоқли клиникасида шу пайтга қадар 42 нафар бемор коронавирусдан тузалди.
Бундан ташқари, 21 апрель куни Вирусология илмий-текшириш институти клиникасида даволанган беморлардан яна 13 нафари ҳам буткул соғайди ва Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Мазкур тиббий муассасада соғайган беморларнинг 3 нафари эркак, 10 нафари аёллардир. 11 нафари Тошкент шаҳридан, Қашқадарё ва Тошкент вилоятларидан бўлган 1 нафардан бемор ҳам соғайган. Беморлардан 1 нафари чартер рейсда Туркиядан Тошкентга келган. Қолган 12 нафари коронавирусга чалинганлар билан мулоқотда бўлиб, касалликни юқтириб олган. Улар орасида энг каттаси 71 ёшда бўлса, энг кичиги 2019 йилда туғилган. Самарали даволаш муолажаларидан кейинги текширувлар уларда инфекция йўқлигини кўрсатди.
Айни пайтга қадар Ўзбекистонда коронавирус инфекциясидан бутунлай соғайган беморлар сони 357 нафарга етди.
Соғлиқни сақлаш вазирлиги 21 апрель куни мамлакат бўйича 96 нафар беморнинг тузалиб, реабилитацияга кузатилгани ҳақида хабар берди. Хусусан, Андижон вилоятида 8 нафар, Фарғона вилоятида 5 нафар, Бухоро вилоятида 15 нафар, Хоразм вилоятида 4 нафар, Наманган вилоятида 20 нафар ҳамда Тошкент шаҳрида 44 нафар бемор реабилитацияга кузатилди.
Ўзбекистонда 21 апрель соат 10:00 ҳолатига кўра, коронавирус инфекциясини юқтириб олганлар сони 1657 нафарни ташкил этмоқда. Мамлакатда коронавирусдан вафот этганлари сони 21 апрель куни олти кишига етди, Наманганда 73 ёшли эркак вафот этди. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.
