Андижон вилоятидаги 28 та деҳқон бозорларининг кириш қисмига дезинфекция қилувчи туннель ва санитария постлари ўрнатилди, дея хабар бермоқда «Дарё» мухбири Умиджон Мамарасулов.
Бозорларда дезинфекция туннелларни ўрнатиш андижонлик ёшлардан чиққан таклиф бўлиб, туннелларни ишлаб чиқаришга Ўзбекистон ёшлар иттифоқи ҳомийлик қилмоқда.
«Бозорлар, аҳоли кўп тўпланадиган жамоат жойларига ўрнатилиши кўзда тутилган дезинфекция туннели, шубҳасиз, касаллик тарқалишининг олдини олишга ёрдам беради. Ҳар бири 200 литр миқдорда икки турдаги антисептик суюқлик билан тўлдириладиган туннеллар махсус қурилмалар ёрдамида туннелдан ўтаётганларни дезинфекция қилади. Дезинфекция жараёнида шахснинг танаси ва қўли учун бошқа-бошқа турдаги антисептик суюқликлардан фойдаланилади», — дейди лойиҳа ташаббускорларидан бири, «Мард ўғлон» давлат мукофоти совриндори Шаҳризод Мусабеков.
Маълум бўлишича, туннель бозордан ташқари карантин даврида фаолият олиб бораётган Андижон шаҳридаги «Bobur M&F» масъулияти чекланган жамияти ҳамда Асака шаҳридаги «Асака дон маҳсулотлари» акциядорлик жамиятининг кириш қисмларига ҳам ўрнатилган.
Изоҳ (0)