Японияда ўзбекистонлик талаба йигитда коронавирус аниқланди

Японияда бир нафар Ўзбекистон фуқаросида коронавирус инфекцияси аниқланди. Бу ҳақда Ўзбекистон ёшлари умумжаҳон ассоциациясининг Япониядаги вакили Жўрабек Ҳасанов маълумот берган.

Ассоциация вакили талаба йигитнинг умумий ҳолати яхши эканлигини билдирган.

Ўзбекистонда 17 апрель соат 23:00 ҳолатига кўра, коронавирус инфекциясини юқтириб олганларнинг умумий сони 1405 нафарни ташкил этмоқда.

Ўзбекистонда 15 мартдан буён коронавирусга чалинган беморларнинг тўрт нафари вафот этди, 156 нафари эса соғайиб, реабилитацияга олинди. Хорижда камида 23 ўзбекистонликда коронавирус аниқланган.

5 апрелда Нью-Йоркда доимий яшаб, ишлаб келган, оилалари ҳам шу ерда бўлган икки нафар ўзбекистонликнинг COVID-19’дан вафот этгани хабар қилинган, кейинчалик Ўзбекистон ТИВ ушбу маълумотни тасдиқлаганди. 7 апрелда яна бир ўзбекистонлик коронавирусдан ўлгани маълум қилинди. Кейинроқ Нью-Йоркдаги учинчи қурбон машҳур шашмақом ижрочиси Рустам Самарқандий экани ойдинлашди. 17 апрелда Россияда 39 ёшли ўзбекистонлик бемор коронавирус сабаб ҳаётдан кўз юмган ва шу тариқа хорижда COVID-19’дан вафот этган ўзбекистонликлар сони 4 нафарга етган.