Ўзбекистон бадиий академияси фахрий аъзоси, Камолиддин Беҳзод номидаги Миллий рассомчилик ва дизайн институти ўқитувчиси Жасур Жумаев карантин пайтида қўни-қўшниларининг кайфиятини кўтариш мақсадида уйи олдида кўргазма ташкиллаштирди.

Фото: Facebook / Жасур Жумаев

«Ўқитувчилик фаолиятимдан ташқари мен ижод билан шуғулланаман, сомондан санъат асарлари яратаман. Мен анчадан бери шахсий кўргазмамни ўтказишни режалаштираётган эдим.

Мен кўп қаватли уйнинг биринчи қаватида яшайман, кичик ҳовлим бор. Ўз расмларимни ҳовлига олиб чиқдим ва юқори қаватларда истиқомат қилувчи қўшниларнинг уларни кўриш имконияти бўлиши учун расмларни тепага қаратиб қўйдим, уларнинг кайфиятларини кўтариш ниятида эдим. Шу билан биргаликда, ушбу кўргазмамнинг ижтимоий тармоқларда тўғридан-тўғри намойишини амалга оширдим», — дейди Жасур Жумаев.

Жасур Жумаев ўз ташаббуси тўғрисида, шунингдек «Ўтиш даврида инклюзия усталарининг янги роли» мавзусига бағишланган Халқаро инклюзив онлайн-конференцияда ҳам сўзлаб берди. Бу ҳақда «Дарё»га конференция ташкилотчилари хабар берди.

Халқаро инклюзив онлайн-конференцияда Ўзбекистон, Россия, Германия, Тожикистон, Латвия ва АҚШ каби 50 дан ортиқ мамлакат вакиллари иштирок этди.

«Мен учун конференцияда иштирок этишнинг ўзи энг муҳим воқеа бўлди, чунки бу мен учун биринчи тажриба. Ягона онлайн муҳитда бошқа мамлакатлар вакиллари билан учрашиш жуда қизиқарли бўлди. Оддий ҳаётда, имконияти чекланган шахслар билан ахборот алмашиш ва мулоқот ўрнатиш учун конференция ташкил этишга катта маблағ, вақт ва ҳаракат талаб этилади. Энди эса янги технологиялар интернет имкониятларини кенгайтирмоқда, чекланишлар, жойлашув ва бошқа шартларга қарамай бизларни яқинлаштирмоқда», — дейди Жасур Жумаев онлайн конференциядаги иштироки ҳақида.

Фото: Facebook / Жасур Жумаев

Фото: Facebook / Жасур Жумаев

Фото: Facebook / Жасур Жумаев

Фото: Facebook / Жасур Жумаев

Фото: Facebook / Жасур Жумаев

Фото: Facebook / Жасур Жумаев

Халқаро онлайн инклюзив конференция «Белая трост» автоном нотижорат ташкилоти томонидан Бошқарув дизайн ва рақобат стратегиялари институти (Россия) билан ҳамкорликда ҳамда «Росатом» давлат корпорацияси кўмагида ташкил этилди.