Зангиотада стикерсиз иккита машина ўзаро тўқнашув содир этди. Ҳайдовчилардан бири вафот этди

15 апрель куни соат 21:00 ларда Тошкент вилояти Зангиота туманида Nexia ва Lacetti ўртасида тўқнашув содир бўлди. Бу ҳақда ИИВ ЙҲХББ ахборот хизмати хабар берди.

Туркистон қишлоқ фуқаролар йиғинининг Ramadaн кўчасида 25 ёшли И.А. исмли фуқаро Nexia машинасини транспорт воситасига ҳаракатланиш ҳуқуқини берувчи махсус стикерсиз ҳайдаб кетаётиб, бошқарувни йўқотган ва йўл-транспорт ҳодисаси содир этган. Nexia қарама-қарши йўналишга чиқиб кетиб, ўз йўналиши бўйича ҳаракатланиб келаётган Lacetti билан тўқнашув содир этган.

Маълум бўлишича, Lacetti автомашинасида ҳам ҳаракатланиш ҳуқуқини берувчи махсус стикер бўлмаган.

Тўқнашув оқибатида Nexia русумли транспорт воситаси ёниб кетган ва ҳайдовчи И.А. воқеа жойида вафот этган. Lacetti ҳайдовчиси турли тан жароҳатлари билан шифохонага ётқизилган.

Мазкур ҳолат юзасидан туман ИИБ Тергов бўлими томонидан суриштирув ишлари олиб борилмоқда.