Ўзбекистон Энергетика вазирлиги Қорақалпоғистоннинг Қараўзак туманида 100 МВт қувватга эга шамол электр станциясини қуриш бўйича тендер эълон қилди. Бу ҳақда вазирлик матуот хизмати хабар берди.
Энергетика вазирлиги, Инвестициялар ва ташқи савдо вазирлиги ва Молия вазирлиги ҳузуридаги Давлат-хусусий шерикликни ривожлантириш агентлиги мустақил электр энергиясини ишлаб чиқарувчиларни ушбу лойиҳа бўйича объектларни ривожлантириш, молиялаштириш, қуриш, эгалик қилиш ва улардан фойдаланишда иштирок этишга таклиф этади.
Ушбу шамол энергияси лойиҳаси бўйича биринчи тендер Европа тикланиш ва тараққиёт банкининг кўмаги билан умумий қуввати 1 ГВт бўлган шамол электр станцияларини қуриш бўйича ҳамкорлик шартномаси доирасида амалга оширилади.
Таъкидланишича, Қорақалпоғистон Республикасининг Қараўзак туманида ушбу шамол электр станциясини ва тегишли инфратузилмани қуриш учун жой танланган. Айни пайтда ушбу ҳудудда экологик тадқиқотлар ва қушларнинг миграциясини ўрганиш бўйича ишлар олиб борилмоқда.
Шунингдек, биринчи электр станцияси қуриладиган майдон яқинида умумий қуввати 200 МВт бўлган шамол электр станциясини барпо этиш режалаштирилган. Ушбу лойиҳани амалга ошириш учун шунга ўхшаш тендер ўтказилади. Лойиҳа Ўзбекистон ҳукумати томонидан амалга оширилаётган, қайта тикланадиган энергия манбаларини жалб қилиш бўйича кенг кўламли стратегиянинг бир қисмидир.
Ушбу стратегия мамлакатда иқтисодий ўсиб бораётган электр энергияси истеъмолини қондириш учун келгуси 10 йил ичида қуввати 3 ГВт гача бўлган шамол электр станциялари қурилишини кўзда тутади.
2019 йилнинг август ойида Президент қарорига асосан Бирлашган Араб Амирликларининг Masdar компанияси иштирокида Ўзбекистонда шамол электр станциялари қуриш бўйича инновацион лойиҳаларни амалга ошириш белгиланган эди. Октябрь ойида эса Бирлашган Араб Амирликлари Навоийда 100 мВт қувватли қуёш электр станциясини қуриши маълум бўлганди.
Изоҳ (0)