Ўзбекистонда 16 апрель соат 10:00 ҳолатига кўра коронавирусга чалинган беморлар сони 1349 нафарга етган бўлса, ҳозирги вақтда шундан 325 нафари Тошкент шаҳрида даволанмоқда (ҳудудларда айни вақтда даволанаётган беморлар сони 913 нафар). Бу ҳақда Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков «Ўзбекистон 24» телеканалида чиқишида маълум қилди.
Вирусология илмий-текшириш институти раҳбариятидан олинган маълумотга кўра, институт клиникасида даволанаётган 100 нафар беморнинг тўрт нафарининг аҳволи оғир, бир беморнинг аҳволи нисбатан оғир, яна бир нафарининг аҳволи эса ўта оғир, деб баҳоланмоқда. Даволанаётган беморларнинг 26 нафарида пневмония клиник белгилари кузатилмоқда.
Эпидемиология, микробиология ва юқумли касалликлар илмий-текшириш институти раҳбариятидан олинган маълумотга кўра, ушбу институт клиникасида даволанаётган 101 нафар бемордан икки нафарининг аҳволи оғир деб баҳоланмоқда. Тошкент тиббиёт академиясининг кўп тармоқли клиникасида даволанаётган 124 нафар беморнинг олти нафарининг аҳволи оғир деб баҳоланмоқда.
Эслатиб ўтамиз, Ўзбекистонда ҳозиргача коронавирусга чалинган беморларнинг тўрт нафари вафот этди, 107 нафари эса соғайди.
Изоҳ (0)