2020-yil bahor-yoz mavsumida qanday shimlar urfda bo‘ladi?

Bahor-yoz mavsumini shimlarsiz tasavvur qilib bo‘lmaydi. Hech bir moda chiqishlari yo‘qki turli uslubdagi shimlarsiz, yangi obrazlarsiz yaratilsa. Shim har bir ayol garderobida alohida o‘rin egallaganini ayta olamiz. Cosmopolitan nashri 2020-yil bahor-yoz mavsumida urfda bo‘ladigan shimlar ro‘yxati bilan bo‘lishdi.

Klassik uslubdagi ayollar shimi

Ushbu uslubdagi shimning muxlislari ko‘p ekaniga shubha yo‘q. Klassik uslubdagi shimni to‘g‘ri moslasa faqatgina dress kod sifatida emas, kundalik turmush yoki oqshom obrazi sifatida ham kiysa bo‘ladi. Mazkur shimlar ayollarni tartibli, didli, qomatni ozg‘in qilib ko‘rsatadi.

Sport uslubidagi shim

Ushbu uslubdagi shimni faqat sport mashg‘ulotlarida kiyiladi deb o‘ylaganlar qattiq adashadi. Street style’da ko‘zga ko‘ringan obrazlarni ikkitadan bittasi mazkur shim ishtirokida bo‘ladi. Uning qulayligi, harakatlanishga osonligi ayollarni o‘ziga rom qilayotganiga sabab bo‘lmoqda.

Kalta shimlar

Ushbu model istalgan poyabzal bilan moslashishi mumkinligi bilan ahamiyatli. Mazkur shim bilan sport uslubi, klassik yoki nafis obrazlar yaratish mumkin. Asosiysi fantaziyani ishga solish va garderobdagi kiyim-kechaklarning qay birini moslash mumkinligi haqida o‘ylash kerak xolos.

Qomatni aks ettiradigan shimlar

2020-yilning eng mashhur trendlaridan biri deb e’tirof etilgan mazkur model o‘ziga xosligi bilan ajralib turadi. Saint Laurent Paris tomonidan bir qancha rang va obrazlar bilan taqdim qilingan bunday uslubdagi shim, har kimning qomatiga mos tushavermasligini ham inobatga olish kerak.

Bel qismi yuqori bo‘lgan shimlar

Mazkur model shubhasiz qomatni chiroyli, oyoqlarni uzun va belni ingichka ko‘rsatadi. Uni top va kastyum bilan yoki kalta va keng vodolazka bilan moslash mumkin.

Keng shimlar

Aksariyat qiz va ayollar nima uchundir bunday uslubdagi shim ularni to‘laroq ko‘rsatadi degan xayolga boradi, aslida esa o‘xshatib, mos kiyilsa faqat va faqat qomatni chiroyli ko‘rsatadi.

Yorqin rang-barang shimlar

Bahor va yoz mavsumi och va rang-barang shimlar kiyish uchun ayni muddao. Och rangli krossovka, keta yoki bosonojka bilan moslash obrazni yanada jozibador qilib ko‘rsatadi. Shuningdek, top, futbolka yoki shifon koftalar bilan kiyish ham tavsiya qilinadi.