«Реал» раҳбарияти жорий мавсум якунлангач камида иккита улкан трансферга қўл урмоқчи.
Мадридликларнинг нишони «Манчестер Юнайтед» ярим ҳимоячиси Пол Погба ва «Боруссия Д» ҳужумчиси Эрлинг Ҳоландга қаратилган, дея хабар қилмоқда Sports Mole.
Погбанинг трансфери 80 миллион еврога баҳоланмоқда. 27 ёшли футболчининг «Манчестер Юнайтед» билан амалдаги шартномаси 2021 йилнинг ёзига қадар мўлжалланган, бироқ инглизлар уни 2022 йилга қадар узайтириш ҳуқуқига эга.
Ҳоланд 2020 йилнинг январь ойида дортмундликлар сафига келиб қўшилди. Унинг немис клуби билан амалдаги келишуви 2024 йилнинг ёзига қадар мўлжалланган. 19 ёшли ҳужумчининг трансфер 72 миллион еврога баҳоланмоқда.
«Реал» 2019 йилнинг ёзида Погбани сотиб олишга уриниб кўрган, бироқ манчестерликларнинг юқори молиявий талаблари туфайли мазкур трансфердан воз кечганди. Бироқ «қаймоқранглилар» устози Зинедин Зидан ҳамюртини олиб келиш фикридан қайтмаган.
Marca’нинг хабар қилишича, Мадрид клуби Ҳоланд эвазига марказий ҳужумдаги бўшлиқни тўлдирмоқчи. «Реал» 2019 йилнинг ёзида сотиб олган Лука Йович ишончни оқламади. Шу сабаб жамоа эътиборини норвегиялик футболчига қаратади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)