Ўтган бир сутка ичида Россияда коронавирус оқибатида 24 киши вафот этди. Бу ҳақда вирусга қарши кураш бўйича тезкор штаб маълумотларига таяниб, «РБК» хабар берди.
Маълумотларга кўра, Россия пойтахтида коронавирус билан касалланган жами беморлар сони 10 158 кишига етган.
Вирус оқибатида вафот этганларнинг аксарияти Москва шаҳрида — 14 киши. Бундан ташқари, 11 апрель куни пойтахт шифохоналаридан COVID-19 коронавирус инфекциясидан даволанишга муваффақ бўлган 188 беморга жавоб берилган. Шундай қилиб, Москвада коронавирусдан даволанган беморларнинг жами сони 687 кишига етди.
Таъкидланишича, ўтган бир сутка давомида бутун мамлакат бўйлаб яна 2186 кишида коронавирус аниқланган бўлиб, уларнинг 1306 нафари Москвада истиқомат қилади. Ҳозирга қадар пойтахтда 72 киши, бутун мамлакат бўйлаб эса 130 киши коронавирус қурбонига айланган.
Аввалроқ Москва мэри Сергей Собянин пойтахтда коронавирус инфекциясининг энг юқори чўққиси ҳали содир бўлмаганини маълум қилганди.
Эслатиб ўтамиз, Ўзбекистонда коронавирус билан касалланганлар сони 833 нафарга етди.
Изоҳ (0)