Чеченистон раҳбари Рамзан Қодиров бир қатор ингушетияликларни сўккани учун улардан узр сўради. У Чеченистон ва Ингушетия чегаралари тўғрисидаги келишувни танқид қилган ингушларни сўккан. Қодиров «Чечня сегодня» нашрига берган интервьюсида ўшанда нотўғри иш қилганини тан олган ва сўзлари учун узр сўраган. Бу ҳақда «РБК» хабар берди.
«Ҳақиқий ингуш ҳеч қачон ўзининг қардоши чеченга ёмон сўз айтмайди, чечен ҳам ҳақиқий ингушга бундай иш қилмайди. Бу ўринда мен ўз сўзларим учун узр сўрашим керак», — деган Қодиров ўз интервьюсида.
Рамзан Қодировнинг аниқлик киритишича, у узрни чечен ва ингуш халқи ўртасида жанжал чиқармоқчи бўлаётганлардан эмас, балки ҳурматли кишилардан сўрайди.
Қодировнинг айтишича, у сўкинган пайтда ҳиссиётга берилган ва сўкинганини ўзи ҳам билмаган. Бу ҳақда кейинроқ матбуот орқали билган.
Қайд этилишича, воқеа Instagram’даги жонли эфир вақтида юз берган. Эфир вақтида Қодиров 2018 йилда чечен-ингуш маъмурий чегараларининг белгиланиши ҳақидаги қарорни танқид қилганларга жавоб берган ва уларни сўккан.
Икки ҳудуд ўртасидаги чегара бўйича низолар Собиқ иттифоқ қулагандан кейин юзага келган, чунки республикалар ўртасидаги чегара аниқ белгиланмаган эди, улар ягона Чечен-Ингуш автоном республикаси таркибига кирган. 1990 йилларнинг охирида Ингушетия ва Чеченистон ўртасида ҳудудий баҳслар бошланган ва улар Сунжен ва Малгобек туманларига тааллуқли бўлган.
2018 йилнинг сентябрь ойида ҳудудлар раҳбарлари Рамзан Қодиров ва Юнусбек Ёвқуров келишиб олди ва икки ҳудуд ўртасидаги чегара ҳақидаги келишувни имзолади. Шундан сўнг, Ингушетияда мазкур келишувга қарши намойишлар бўлиб ўтди. Чегара ҳақидаги қарорни референдум ёрдамида ҳал қилишга уринишлар бўлди, бироқ республика сайлов комиссияси аризани рад этган. 2019 йилнинг июнь ойида Ёвқуров республика раҳбарлигидан кетди, кейинроқ Россия конституцион суди чегара ҳақидаги қарорни қонуний деб топди.
2019 йилнинг 16 август куни Ингушетия Олий суди Ингушетия ва Чеченистон ўртасида маъмурий чегаралар ўрнатилишининг қонунийлигини тасдиқлади.
Аввалроқ Рамзан Қодиров коронавирус тарқалишининг олдини олиш мақсадида Чеченистон чегарасининг кириш-чиқиш учун ёпилишини эълон қилган эди.
Изоҳ (0)