Хитойда ўтган бир сутка ичида 99 кишида янги турдаги коронавирус инфекцияси аниқланди. Бу ҳақда Хитой Соғлиқни сақлаш миллий комиссияси хабар берди.
Таъкидланишича, янги беморларнинг 97 нафари хориждан кириб келган ва икки кишигина мамлакат ичида юқтириб олган. Тиббиёт ходимлари яна 49 фуқарода COVID-19 борлигини гумон қилмоқда. Буларнинг барчаси четдан юқтирилган.
Коронавирус пандемияси ўчоғи ҳисобланган Хубэй провинцияси ва Ухань шаҳрида касалликка чалиниш бўйича бирорта янги ҳолат аниқланмаган.
Маълумотларга кўра, Хитойда коронавирусни четдан юқтириш билан боғлиқ жами 1280 та ҳолат қайд этилган. Улардан 799 нафари касалланганлигича қолмоқда, 481 киши тузалган.
Ўтган бир сутка ичида Хитойда коронавирус оқибатида ҳеч ким вафот этмаган. Мамлакатда пандемия бошланганидан буён 82 052 кишида коронавирус аниқланган, 3339 киши вафот этган. Айни вақтда Хитой шифохоналарида COVID-19 ташхиси қўйилган 1138 бемор қолмоқда. Улардан 139 нафари оғир аҳволда.
Аввалроқ Хитой ўз ҳудудида коронавирус тарқалишини тўхтатгани, мамлакатда автомобиль саноати яна оёққа туриб, ишлаб чиқаришни қайта йўлга қўйилгани ҳақида хабар берилганди. 8 апрель куни Хитой ҳукумати январь ойидан бери илк бор Ухандан чиқиш йўлларини очди.
Мавзуга доир:
Изоҳ (0)