Фарғонанинг Ёзёвон туманида яшовчи, Умра сафарида бўлиб қайтган 59 ёшли Н. исмли аёлда 25 март куни коронавирус инфекцияси тасдиқлангач, у вилоят юқумли касалликлар шифохонасига ётқизилган эди. Бемор 31 март куни сунъий нафас олиш аппаратига уланган.
«Беморда ўпканинг сурункали обструктив касаллиги, гипертония 3-босқич, артериал гипертензия 3-даража, хавф ўта юқори бўлганлиги сабабли касаллик оғир кечиб, у 12 кун давомида сунъий нафас олиш аппаратида бўлган», — дея хабар бермоқда Соғлиқни сақлаш вазирлиги.
Қайд этишларича, даволаниш даврида етакчи шифокор ва мутахассислар томонидан керакли тавсиялар бериб борилган, даволаш стандартларига мувофиқ, вирусга қарши, антибактериал, инфузион, муколитик, симптоматик ва респиратор терапия муолажалари ҳам олиб борилган.
11 апрель куни кечки пайт беморнинг аҳволи кескин ёмонлаша бошлаган. Унга шошилинч реанимацион муолажалар кўрсатилган. Шунга қарамай, бемор Н.да ўткир респиратор дисстрес синдром, ўткир нафас етишмовчилиги ҳамда ўпка-юрак етишмовчилиги натижасида биологик ўлим қайд этилган.
Мавзуга доир: Коронавирусдан вафот этган киши қандай дафн этилади? Ўзбекистон мусулмонлари идораси жавоб берди
Бу Ўзбекистонда коронавирусга чалинган беморларнинг ўлими билан боғлиқ тўртинчи ҳолат. Бунгача 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган), 28 март куни Тошкент шаҳрида ўзини уйда даволашга уринган 39 ёшли шифокор коронавирус инфекциясидан, 7 апрель куни эса коронавирусга чалинган 40 ёшли бемор юрак ва ўпка етишмовчилигидан вафот этгани маълум қилинган эди.
Маълумот учун, Ўзбекистонда 11 апрель соат 23:00 ҳолатига жами 767 киши коронавирус инфекциясига чалингани тасдиқланган, уларнинг 42 нафари соғайган. Бундан ташқари, хорижда камида 23 ўзбекистонликда коронавирус инфекцияси аниқланган, уларнинг уч нафари (бари — АҚШда) вафот этган.
