Қозоғистонда коронавирус билан касалланганлар сони 802 кишига етди, деб хабар беради Tengrinews.
Фото: КNews.kg
10 апрель соат 09:00 ҳолатига кўра, яна 21 кишида COVID-19 коронавирус инфекцияси аниқланган: Шимолий-Қозоғистон ва Манғистов вилоятларида — икки кишидан, Қизилўрда, Қарағанда ва Чимкент вилоятларида — тўрт кишидан, Атирау — уч, Ўқмўла вилоятида ва Нур-Султонда — бир кишидан.
Бутун мамлакат бўйлаб коронавирусга чалинганларнинг чорак қисмидан ортиғи — 226 нафари Нур-Султон шаҳри ҳисобига тўғри келмоқда.
Шунингдек, бугун, 10 апрель куни мамлакатда яна бир бемор коронавирус оқибатида вафот этган. 1956 йилда туғилган бемор Қозоғистонда ҳисоб бўйича коронавирус қурбонларининг тўққизинчисига айланди.
Эслатиб ўтамиз, Қозоғистонда коронавирус оқибатида биринчи ўлим ҳолати Оқмўла вилоятида қайд этилган. 26 март куни Нур-Султонда 64 ёшли аёл, 31 март куни 50 ёшли эркак, 1 апрель куни Қарағандада 62 ёшли эркак. 4 апрель куни Туркистон ва Оқмўла вилоятларида икки киши вафот этгани маълум бўлди. 5 апрель куни Чимкентда бир бемор вафот этган бўлса, 8 апрель куни Оқмўлада яна бир ўлим ҳолати қайд этилган. 9 апрель куни Павлодарда ҳам бир бемор коронавирус оқибатида вафот этган.
Ўзбекистонда коронавирусга чалинганлар сони 10 апрель Тошкент вақти билан соат 10:00 ҳолатига кўра, 624 кишига етди. Мамлакатда коронавирус инфекциясига чалиниш билан боғлиқ дастлабки ҳолат қайд этилганидан бери 38 киши касалликдан соғайишга муваффақ бўлди, шу билан бирга уч киши (бир аёл ва икки эркак) коронавирус сабаб вафот этди.
