Наманган вилоятида 4 нафар коронавирусни юқтирган фуқаро бутунлай соғайди. Улар вилоят соғлиқни сақлаш бошқармаси бошлиғи Солижон Мўминов ва бошқа масъуллар томонидан вилоят реабилитация марказига кузатиб қўйилди. Касалликдан тузалган фуқаролар маълум муддат шу ерда карантинда бўлади. Бу ҳақда Соғлиқни сақлаш вазирлиги хабар берди.
Фото: Соғлиқни сақлаш вазирлиги
«Бугун менинг ҳаётимда унутилмас сана. Худди қайта дунёга келгандек ҳис этяпман ўзимни. Бизни ўйлаб шунчалик шароит яратиб берган Президентимизга беҳисоб раҳмат. Шифокорларимиздан бир умр миннатдормиз. Улар ўзларининг жасоратли хизматлари, юксак малакалари, инсоний муносабатлари билан бизни оёққа турғазишга сабаб бўлди», — деди тузалган беморлардан бири.
Фото: Соғлиқни сақлаш вазирлиги
Шу тариқа, Ўзбекистонда коронавирусдан тузалганлар сони 42 нафарга етди. 9 апрель куни касалликдан тузалган 8 киши Вирусология илмий-текшириш институти клиникасидан Республика ихтисослаштирилган терапия ва тиббий реабилитация илмий-амалий тиббиёт марказига кузатилган эди.
Мавзуга доир: Ўзбекистонда коронавирусга чалингани аниқланган илк бемор соғайди. У билан бирга 14 нафар оила аъзоси касалхонани тарк этди
Маълумот учун, Ўзбекистонда коронавирусга чалинганлар сони 10 апрель Тошкент вақти билан соат 10:00 ҳолатига кўра 624 кишига етди. Шу вақтгача касалликдан уч киши (бир аёл ва икки эркак) вафот этди.
