Ўзбекистон Президенти Шавкат Мирзиёев раислигида 8 апрель, чоршанба куни, коронавирус пандемиясига қарши курашишда жойлардаги ишлар натижадорлиги таҳлили ҳамда озиқ-овқат хавфсизлигини таъминлаш, аҳоли бандлиги ва даромадини оширишнинг муҳим манбаи бўлган томорқачиликни ривожлантиришга бағишланган видеоселектор йиғилиши бўлиб ўтди. Бу ҳақда Президент матбуот хизмати хабар берди.

Фото: Президент матбуот хизмати

Президентнинг қайд этишича, қисқа муддатда фуқаролар, давлат ва нодавлат ташкилотлар томонидан «Ўзбекистон Меҳр-шафқат ва саломатлик» жамғармасига 50 миллиард сўмдан ортиқ маблағ ўтказилган.

Йиғилишда қайд этилишича, Зангиота туманида 10 минг ўринга мўлжалланган махсус шифохона жадал суръатларда қуриляпти. Юқори Чирчиқ туманида эса 10 минг кишилик махсус карантин зонаси қурилиб, ўз ишини бошлади. Бу ерда яна қўшимча 10 минг ўринга мўлжалланган карантин зонаси қурилиши бошланиб, 15 майгача топширилади.

Таъкидланишича, пандемия шароитида сўнгги бир ой ичида хорижий давлатлардан 20 та чартер рейс орқали 6 минг, темир йўл ва чегара постлари орқали 10 минг нафар фуқаро олиб келинди. Уларнинг барчаси 160 та манзилга жойлаштирилиб, карантинга олинди.

Тажрибали шифокор-профессорлардан иборат махсус штаб тузилиб, ҳар бир беморни даволашда 24 соатлик онлайн маслаҳат бериш йўлга қўйилди. Хитой ва Жанубий Кореядан вирусологлар таклиф қилинди. Россия, Германия, Япония, Туркия каби давлатлар мутахассислари билан ҳам доимий телемедицина алоқалари ўрнатилган.

Фото: Президент матбуот хизмати

«Энг муҳими — халқимиз юзага келган вазиятни тўғри баҳолаб, ўз хизмат вазифаларини масофадан туриб бажармоқда, шифокорлар тавсияси ва карантин тартиб-қоидаларига қатъий амал қилиб, ўзларининг маданияти, онги ва интизоми билан барчага ўрнак бўлмоқда. Ўқувчи ва талаба ёшларимиз онлайн дарс ва машғулотлар орқали таълим олишда давом этмоқда», — деди давлат раҳбари.

Одамларни озиқ-овқат маҳсулотлари, дори-дармон ва тиббиёт воситалари билан узлуксиз таъминлаш тизими самарали йўлга қўйилган. Шунингдек, саховатли ва олижаноб фуқаролар томонидан кўрсатилаётган беғараз хайрия ёрдамлари манзилли равишда аҳолининг тегишли қатламларига ўз вақтида етказиб берилмоқда.

Аввалроқ «Ўзбекистон Меҳр-шафқат ва саломатлик» жамғармасига бир қатор давлат ташкилотлари ва фуқаролар томонидан пул маблағлари ўтказиб берилгани ҳақида хабар берилган эди. Ўзбекистонлик бир гуруҳ таниқли санъаткорлар ҳам коронавирус эпидемиясига қарши курашиш учун 350 миллион сўмдан кўпроқ маблағ ажратди.

Эслатиб ўтамиз, Россияда истиқомат қилувчи ва айни пайтда Тошкентдаги уйида ўз-ўзини ижтимоий изоляция қилаётган ўзбек миллиардери Алишер Усмонов ушбу фондга 20 миллион доллар маблағ ўтказиб берди. Президент Шавкат Мирзиёев эса буннг учун унга миннатдорчилик билдирган эди.