Milliarder Alisher Usmonov koronavirus pandemiyasi vaqtida Toshkentda izolyatsiyada yashashga qaror qildi. Bu haqda uning o‘zi Forbes nashriga bergan intervyusida ma’lum qilgan.

Foto: RBC

“Koronavirus pandemiyasi biznesga ham jahon iqtisodiyotiga ham salbiy ta’sir qildi. Tadbirkorlarning nafaqat aktivlari, balki majburiyatlari ham bor. Ular uchun nafaqat virus, balki bozorlarni larzaga solayotgan axborot to‘lqini ham juda xavfli.

Pandemiya qarshisida hamma barobar, Xudo saqlasin. Hozir eng muhimi – odamlar salomatligi va baxti uchun dunyo davlatlari rahbarlari iroda ko‘rsatib, geosiyosiy qarama-qarshiliklarga qaramay, global xavf qarshisida birlasha olishi zarur.

Menga kelsak, xavf guruhiga kirganim sabab, o‘zimning tarixiy vatanim – Toshkent shahrida o‘z-o‘zimni izolyatsiya qildim”, – deydi 66 yoshli Alisher Usmonov.

Forbes’da shuningdek, Oleg Deripaska, David Yakobashvili, Araz Agalarov, Vyacheslav Bresht, Igor Ribakov, Mixail Kusnirovich, Andrey Kuzyayev va Sergey Kolesnikov kabi Rossiya milliarderlari ham COVID-19 haqidagi fikr mulohazalari bayon qilingan.

O‘zbekistonda koronavirusga chalinganlar soni 49 nafarga yetgan, Toshkent shahri 24-martdan boshlab yopilgan. O‘zbekistonda koronavirus infeksiyasi tarqalishiga qarshi kuchaytirilgan tartib joriy etilgan, unga ko‘ra, koronavirus yuqtirganlardan mobil telefonlar olib qo‘yiladi, abonentlarda internet va telefon aloqasi uchun to‘lovlar kechiksa, ular tarmoqdan uzib qo‘yilmaydi. Shuningdek, 24-martdan boshlab mamlakatdagi dehqon bozorlaridan tashqari barcha bozorlarning faoliyati to‘xtatilgan.