Ўзбекистонда коронавирусга чалинган яна бир бемор вафот этди. Бу ҳақда Соғлиқни сақлаш вазирлиги матбуот хизмати маълум қилди.
Маълум бўлишича, Чирчиқ шаҳрида яшовчи фуқаро Ш. 30 март куни оғир аҳволда вилоят юқумли касалликлар шифохонасига ётқизилган. 31 март куни эса Тошкент шаҳридаги Эпидемиология, микробиология ва юқумли касалликлар илмий текшириш институти клиникасига ўтказилган.
«Зудлик билан амалга оширилган лаборатор таҳлил натижаси унда коронавирус инфекцияси борлигини тасдиқлаган», — дейилади Соғлиқни сақлаш вазирлиги ахборотида. 40 ёшли бемор ушбу клиниканинг реанимация бўлимида, сунъий нафас олиш аппаратида бўлган.
Соғлиқни сақлаш вазирлигининг алоҳида қайд этишича, бемор Ш.га тиббий ёрдам кўрсатиш вақтида, даволаш стандартларига мувофиқ, вирусга қарши, антибактериал, инфузион, муколитик, симптоматик ва респиратор терапия муолажалари ҳам олиб борилган.
Таъкидланишича, 7 апрель оқшомида беморнинг аҳволи кескин ёмонлашган. Етакчи шифокорлар томонидан берилган тавсиялар тўлиқ бажарилганига қарамай, бемор Ш.да юрак ва ўпка етишмовчилиги сабаб юрак фаолияти тўхташи кузатилган.
Аввалроқ, 27 март куни Наманган вилоятида коронавирусга чалинган 72 ёшли онахон миокард инфарктидан вафот этгани (унинг жанозасида қариндошларидан ҳеч ким иштирок этмаган), 28 март куни Тошкентда 39 ёшли шифокор уй шароитида ўзини коронавирусдан даволашга уриниб, охир-оқибат вафот этгани ҳақида хабар берилган эди.
Қайд этиш жоиз, Тошкент вилояти ҳокимлиги томонидан 6 апрель соат 19:00 ҳолатига берилган ахборотда вилоят ҳудудида коронавирусга чалиниш билан боғлиқ 18 ҳолат қайд этилгани маълум қилинган, шунингдек, беморлар аниқланган маҳалла ва мавзелар рўйхати келтирилган эди, бироқ унда Чирчиқ шаҳри йўқ эди.
Президент — Чирчиқдан оғир аҳволда олиб келинган бемор ҳақида:
Шавкат Мирзиёев 3 апрель куни бўлиб ўтган видеоселектор йиғилишида Чирчиқда аниқланган коронавирусга чалиниш ҳолати ҳақида гапирган эди.
«Кечқурун Чирчиқдан оғир аҳволдаги беморни олиб келишди. Биласизларми, беш-олти кун жуда юқори ҳарорат билан уйида ётган. Ҳолбуки ойнаи жаҳонда 24 соат давомида одамларимизга огоҳ бўлайлик, маданиятли бўлайлик, ўзимизга, бола-чақамизга эътиборли бўлайлик деяпмиз. Йўқ. Беш-олти кун ётган, оиласи бор, фарзанди бор, набираси бор, уйида ётган. Доктор чақирса бўлмайдими?», — деганди ўшанда Президент.