Ўзбекистоннинг Россиядаги элчихонаси Facebook’даги расмий саҳифасида COVID-2019 коронавируси пандемиясидан жабр кўрганлар учун маблағ йиғилишини маълум қилди.
«Ўзбекистон Республикасининг Россия Федерациясидаги Элчихонаси томонидан COVID-2019 коронавируси инфекциясининг тарқалиши муносабати билан Ўзбекистондаги аҳолининг заиф қатламлари ҳамда хорижда оғир вазиятга тушиб қолган фуқароларга ёрдам бериш мақсадида махсус ҳисоб рақами очилди», — дейилади элчихона расмий саҳифасидаги хабарда.
Шунингдек, хабарда Ўзбекистонга ва ўзбекистонликларга ёрдам бериш истагида бўлган тадбиркорлар, корхоналар ёки расмий ташкилотлар хайрия маблағларини ушбу реквизитлар бўйича ўтказиши мумкинлиги қайд этилган.
Маблағлар тўплаш жараёнининг очиқлиги ва шаффофлигини, келиб тушадиган маблағлардан мақсадли фойдаланилиши ҳақида кенг жамоатчиликни хабардор қилиш мақсадида элчихона ижтимоий тармоқлардаги ўзининг расмий саҳифалари орқали доимий равишда батафсил ҳисобот бериб боради.
Элчихона бошлаган хайрия акциясига биринчилардан бўлиб «Бахт-Текстиль» МЧЖ таъсисчиси Баҳритдин Мўминов ўз ҳиссасини қўшганини маълум қилди.
Аввал АҚШнинг коронавирусга қарши курашиш учун Ўзбекистонга 848 минг доллар ажратиши кутилаётгани, Миржалол Қосимов коронавирусга қарши кураш учун 75 миллион сўм хайрия қилгани, Алишер Усмонов «Меҳр-шафқат ва саломатлик» фондига 20 миллион доллар ажратгани, Отабек Шукуров карантин вақтида муҳтож оилаларга ёрдам бериш учун 100 миллион сўм хайрия қилгани, шунингдек, Президент Давлат хавфсизлик хизмати ходимлари иш ҳақининг бир қисмини «Меҳр-шафқат ва саломатлик» жамоат фондига ўтказгани ҳақида хабарлар берилган.
Изоҳ (0)