«Ватан туйғуси» фанидан 5-синф учун тасвирга олинган видеодарсда ўқитувчи Ўзбекистон НАТОга аъзо деб хатога йўл қўйгани учун узр сўради.
ХТВ матбуот котибининг маълум қилишича, ўқитувчи «Мустақиллик – аввало ҳуқуқ демакдир» мавзусини тушунтиришда хатоликка йўл қўйган. Унда Ўзбекистон мустақиллиги ҳақида гапираётган ўқитувчи, мамлакатнинг халқаро ташкилотлар билан ҳамкорлиги ҳақида тўхталмоқчи бўлган.
«Ўзбекистон НАТОнинг аъзоси эмас. Аммо мамлакатимиз мазкур ташкилот билан унинг бир неча дастурлари доирасида ҳамкорлик қилиб келади. Жумладан, «Тинчлик йўлида ҳамкорлик», «Фан тинчлик ва хавфсизлик йўлида» ва бошқалар.
Дарсни олиб борган ўқитувчи бу хатолик учун узр сўраган ҳолда кейинги видеодарсда бу ҳақида қўшимча маълумот беради», — дейилади хабарда.
Шунингдек, қайд этилишича, вазирлик 4 апрель куни телевизион дарсларни суратга олиш лойиҳасига муҳаррир ва ўқитувчиларни ҳамкорликка чақирди. Бир неча соат ичида 250 дан зиёд мутахассис ҳамкорликка тайёрлигини билдирган. Кейинги ҳафтадан тасвирга олинаётган ва эфирга бериладиган дарслар мазмунини қўшимча назорат қилиш учун улар орасидан мутахассислар жалб этилади.
Эслатиб ўтамиз, 16 мартдан коронавирус сабаб Ўзбекистондаги барча таълим муассасалари карантинга ёпилган эди. Шу сабабли мактаб ўқувчиларининг таътил пайтида билим олиши учун видеодарс машғулотларини тайёрлаш ва уни тасвирга олиш бўйича соҳа ходимларидан иборат ташкилий-ижодий гуруҳ тузилди ва 30 мартдан бошлаб телевидение орқали дарслар бериб бориш бошланди.
Изоҳ (0)