Қозоғистоннинг биринчи президенти, элбоши Нурсултон Назарбоевнинг коронавирусга чалингани ҳақидаги миш-мишлар рад этилди, деб хабар бермоқда Tengrinews. Бу ҳақда унинг матбуот котиби маълум қилган.
Матбуот котибининг сўзларига кўра, Хавфсизлик кенгаши раиси Нурсултон Назарбоев вилоят раҳбарлари билан бир нечта телефон суҳбатларини ўтказиб, фавқулодда вазиятларда жамоат хавфсизлигини таъминлашнинг долзарб масалаларини муҳокама қилган.
«Шуни англаш лозимки, қатъий карантин шароитида элбошининг кабинетига кириш чекланган. Аммо чекловларга қарамай матбуот хизмати аҳолини биринчи президентнинг фаолияти тўғрисида ўз вақтида хабардор қилишга ҳаракат қилмоқда. Биз ҳеч қачон миш-мишларга муносабат билдирмаганмиз. Бироқ сўнгги пайтларда айрим шахслар мамлакатдаги вазиятни издан чиқаришга, шу жумладан, элбоши соғлиғи тўғрисида нотўғри маълумотлар тарқатишга уринмоқда. Буларнинг барчаси провокация ва ёлғондир», — деган матбуот котиби.
«Агар кимдир шубҳа қилса, у ҳолда кеча элбоши суҳбатлашган ҳокимлардан сўрашингиз мумкин», — деб айтган ва Нурсултон Назарбоев соғ-саломатлиги, ватан равнақ йўлида ҳатто карантин шароитида ҳам ишлашда давом этаётганини таъкидлаган.
Шунингдек, барча чекловлар олиб ташланганидан сўнг биринчи президент иштирок этган йиғилиш ёки учрашувни шахсан ўзи видеога олиб кўрсатишга ваъда берган.
Эслатиб ўтамиз, Қозоғистонда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинган. Айни пайтда мамлакатда коронавирусга чалинганлар сони 500 кишига етган, касалликдан вафот этиш бўйича тўртта ҳолат қайд этилган.