Qozog‘istonning birinchi prezidenti, elboshi Nursulton Nazarboyevning koronavirusga chalingani haqidagi mish-mishlar rad etildi, deb xabar bermoqda Tengrinews. Bu haqda uning matbuot kotibi ma’lum qilgan.
Matbuot kotibining so‘zlariga ko‘ra, Xavfsizlik kengashi raisi Nursulton Nazarboyev viloyat rahbarlari bilan bir nechta telefon suhbatlarini o‘tkazib, favqulodda vaziyatlarda jamoat xavfsizligini ta’minlashning dolzarb masalalarini muhokama qilgan.
“Shuni anglash lozimki, qat’iy karantin sharoitida elboshining kabinetiga kirish cheklangan. Ammo cheklovlarga qaramay matbuot xizmati aholini birinchi prezidentning faoliyati to‘g‘risida o‘z vaqtida xabardor qilishga harakat qilmoqda. Biz hech qachon mish-mishlarga munosabat bildirmaganmiz. Biroq so‘nggi paytlarda ayrim shaxslar mamlakatdagi vaziyatni izdan chiqarishga, shu jumladan, elboshi sog‘lig‘i to‘g‘risida noto‘g‘ri ma’lumotlar tarqatishga urinmoqda. Bularning barchasi provokatsiya va yolg‘ondir”, — degan matbuot kotibi.
“Agar kimdir shubha qilsa, u holda kecha elboshi suhbatlashgan hokimlardan so‘rashingiz mumkin”, — deb aytgan va Nursulton Nazarboyev sog‘-salomatligi, vatan ravnaq yo‘lida hatto karantin sharoitida ham ishlashda davom etayotganini ta’kidlagan.
Shuningdek, barcha cheklovlar olib tashlanganidan so‘ng birinchi prezident ishtirok etgan yig‘ilish yoki uchrashuvni shaxsan o‘zi videoga olib ko‘rsatishga va’da bergan.
Eslatib o‘tamiz, Qozog‘istonda koronavirus tarqalishi munosabati bilan 16-martdan 15-aprelga qadar favqulodda holat rejimi joriy qilingan. Ayni paytda mamlakatda koronavirusga chalinganlar soni 500 kishiga yetgan, kasallikdan vafot etish bo‘yicha to‘rtta holat qayd etilgan.
Izoh (0)