eBay’да 1969 йили ишлаб чиқарилган камёб Ford Mustang Boss 429 сотувга қўйилгани ҳақида эълон пайдо бўлди. Умумий ҳисобда 21,3 минг километр масофа босган ушбу машина 1981 йилдан буён бир километр ҳам юрмаган — қарийб қирқ йилдан буён гаражда сақланган, деб хабар беради Motor.
Ушбу моделга NASCAR пойгалари учун мўлжалланган 429 двигателининг такомиллаштирилган версияси ўрнатилган бўлиб, у Chrysler’нинг 426 Hemi моторига рақобатчи бўлиши керак эди. Қоидага кўра шу турдаги мотор ўрнатилган автомобилдан камида 500 нусха ишлаб чиқаришга рухсат берилган. Шу сабаб 1969 йилда 859 та, 1969 йилда эса 499 тагина модел йиғилган. Шундай қилиб, ушбу модел жами 1359 нусхада ишлаб чиқарилган.
Техник маълумотларга кўра, Mustang Boss 429 двигатели 380 от кучига эга. Автомобилни ташқи кўриниши ўша даврдаги бошқа Mustang’лардан фарқ қилмайди.
Кам нусхада ишлаб чиқарилгани учун Mustang Boss 429 eBay ҳамда Barret-Jackson’нинг ҳақиқий хазинасига айланган. Масалан, 2008 йилда шу турдаги моделлардан бири 375 минг долларга сотилган бўлса, 2016 йилда қайта тикланган автомобиль кимошди савдосида 500 минг долларга эгасини топган.
Ҳозирда 1969 йилги Ford Mustang Boss’нинг бошланғич нархи 166 300 долларни ташкил этмоқда.