Сурхондарё вилоятида яшовчи афғонистонлик тадбиркор Акобир Аслиддин Покистондан 320 тонна картошка сотиб олиб, вилоят аҳолисига 1400 сўм зарарига сотмоқда. Бу ҳақда «Дарё»га вилоят ҳокимлиги ахборот хизмати раҳбари Заҳириддин Тўраев маълум қилди.
«Тадбиркорнинг айтишича, картошкани юк машиналарига жойлаб, қўшни давлатнинг Амударё соҳилидаги портига келтириш ва у ердан Термиз дарё порти орқали шаҳарда ажратилган махсус омборга олиб келгунча бир кило картошка 5 минг 400 сўмга тушган. Бироқ тадбиркор аҳолига бир кило картошкани 4 минг сўмдан сотяпти. Мақсад — аҳолининг картошкага бўлган эҳтиёжини қондириш», — дейди Заҳириддин Тўраев.
Таъкидланишича, тадбиркор раҳбарлигидаги «Акобир Фазлиддин» МЧЖ вилоят бозорлари ва савдо нуқталарини олма ҳамда мандарин билан ҳам таъминлаб туради.
Заҳириддин Тўраевга кўра, вилоятда қиш-баҳор мавсуми учун жамғарилган картошка захираси мавжуд. Афғон тадбиркори олиб келган маҳсулот эса маҳаллий шароитда парваришланаётган янги картошка савдога чиқарилгунга қадар жойларда картошканинг нархи ошиб кетишининг олдини олади. Одамлар орасида ваҳима уйғотмоқчи бўлаётган айрим шахсларнинг гап-сўзларига барҳам беради.
Термиз шаҳридаги «Яшил дунё озиқ-овқат деҳқон бозори» МЧЖ раиси Б.Қувватовнинг айтишича, афғонистонлик тадбиркор олиб келган картошка савдога чиқарилган дастлабки кунда ҳар бир харидорга 3 килодан жами 5 тонна сотилган.
Картошканинг қолган қисми туманлардаги марказий деҳқон бозорларида савдога чиқарилган.
«Кеча Бандихон, Термиз, Жарқўрғон туманларига етказиб берилди. Бугун бошқа туман мутасаддилари ҳам ўз эҳтиёжидан келиб чиқиб, белгиланган нархда сотиш учун қўшни давлатдан келтирилган арзон картошкани олиб кетмоқда», — дейди вилоят ҳокими матбуот котиби.
Изоҳ (0)