Surxondaryo viloyatida yashovchi afg‘onistonlik tadbirkor Akobir Asliddin Pokistondan 320 tonna kartoshka sotib olib, viloyat aholisiga 1400 so‘m zarariga sotmoqda. Bu haqda “Daryo”ga viloyat hokimligi axborot xizmati rahbari Zahiriddin To‘rayev ma’lum qildi.
“Tadbirkorning aytishicha, kartoshkani yuk mashinalariga joylab, qo‘shni davlatning Amudaryo sohilidagi portiga keltirish va u yerdan Termiz daryo porti orqali shaharda ajratilgan maxsus omborga olib kelguncha bir kilo kartoshka 5 ming 400 so‘mga tushgan. Biroq tadbirkor aholiga bir kilo kartoshkani 4 ming so‘mdan sotyapti. Maqsad — aholining kartoshkaga bo‘lgan ehtiyojini qondirish”, — deydi Zahiriddin To‘rayev.
Ta’kidlanishicha, tadbirkor rahbarligidagi “Akobir Fazliddin” MChJ viloyat bozorlari va savdo nuqtalarini olma hamda mandarin bilan ham ta’minlab turadi.
Zahiriddin To‘rayevga ko‘ra, viloyatda qish-bahor mavsumi uchun jamg‘arilgan kartoshka zaxirasi mavjud. Afg‘on tadbirkori olib kelgan mahsulot esa mahalliy sharoitda parvarishlanayotgan yangi kartoshka savdoga chiqarilgunga qadar joylarda kartoshkaning narxi oshib ketishining oldini oladi. Odamlar orasida vahima uyg‘otmoqchi bo‘layotgan ayrim shaxslarning gap-so‘zlariga barham beradi.
Termiz shahridagi “Yashil dunyo oziq-ovqat dehqon bozori” MChJ raisi B.Quvvatovning aytishicha, afg‘onistonlik tadbirkor olib kelgan kartoshka savdoga chiqarilgan dastlabki kunda har bir xaridorga 3 kilodan jami 5 tonna sotilgan.
Kartoshkaning qolgan qismi tumanlardagi markaziy dehqon bozorlarida savdoga chiqarilgan.
“Kecha Bandixon, Termiz, Jarqo‘rg‘on tumanlariga yetkazib berildi. Bugun boshqa tuman mutasaddilari ham o‘z ehtiyojidan kelib chiqib, belgilangan narxda sotish uchun qo‘shni davlatdan keltirilgan arzon kartoshkani olib ketmoqda”, — deydi viloyat hokimi matbuot kotibi.
Izoh (0)