Самарқанд шаҳридаги Сартепа массивида жойлашган бозор қоровули Ҳусинали Муродов «Дарё»га мурожаат қилиб, карантин сабаб хўрандага ҳот-дог тайёрлаб бермагани учун калтакланганини, ИИБ эса бунга эътибор қаратмаётганини айтмоқда.
Маълум бўлишича, 2020 йилнинг 29 март куни кечаси соат 03:09 да маст фуқаро бозорга келиб, 63 ёшли қоровул Ҳусинали Муродовдан ҳот-дог тайёрлаб беришни сўраган. Бозорда ҳот-дог тайёрлаб сотиш билан шуғулланувчи бозор қоровули эса карантин сабаб ишламаётганини айтган. Маст фуқаро эса қоровулни дастлаб хона ичкарисида, сўнг ташқарида калтаклаган. Бу бозор кузатув камераларида ҳам тасвирланган. 63 ёшли Ҳусинали Муродовнинг шериги, иккинчи қоровул эса бу ҳолатни кўриб қочиб кетган. Натижада калтакланган Ҳусинали Муродов тан жароҳати олиб, елкаси синган.
«Бозорча олдида ҳот-дог пишириб сотадиган дўконимиз бор. Биз уни оилавий юритамиз. Ҳозирда юртимизда эълон қилинган карантин сабабли вақтинча ишламаяпмиз. Отам бозорга қоровулликка келган кунлари ўша ерда тунаб қолади», — дейди Ҳусинали Муродовнинг ўғли Ғуломжон Муродов. — «Воқеа содир бўлган куни отам бозорни кўздан кечириб, ўша ерга келиб ўтирган. Шу вақтда маст ҳолатда бўлган нотаниш киши келиб отамдан ҳот-дог тайёрлаб беришни сўраган. Отам карантин сабабли ишламаётганлигини билдирган. Шундан сўнг, маст бўлган номаълум киши отамни ўша ерда урган».
Ғуломжон Муродовнинг таъкидлашича, калтакланган отаси ҳақида хабар топгач, уни республика шошилинч тез тиббий ёрдам илмий маркази Самарқанд филиалига олиб борган. Отаси тиббий текширувдан ўтказилиб, керакли муолажалардан сўнг уйига қайтарилган.
«Айни пайтда карантин эълон қилинган. Аммо айрим шахслар бунга амал қилмасдан ярим кечаси сотувчиларни мажбурлаб, ишлашини талаб қиляпти. Бу ҳам етмагандай, калтаклаб кетганини тушуниш қийин. Мен ҳуқуқни муҳофаза қилувчи органлардан отамни уриб, унга тан жароҳати етказган, қолаверса, карантин қоидаларини бузган фуқарога қонуний жазо беришини сўрадим», — дейди Ғуломжон Муродов.
Бу ҳақда ИИБга мурожаат қилган Ғуломжон Муродовнинг қўшимча қилишича, ҳудуд профилактика инспектори экспертиза хулосасини олмасдан бирор-бир ҳаракатни амалга оширолмаслигини билдирган. Ҳолбуки, воқеа бозор кузатув камераларига ҳам тушган. Шундай бўлса-да, ИИБ ходимлари воқеани эътибордан четда қолдирмоқда.
Изоҳ (0)