АҚШ ҳукумарти коронавирусга қарши курашишда ёрдам тариқасида Ўзбекистонга 848 минг доллар ажратмоқчи, деб хабар бермоқда ТИВ матбуот хизмати.
Бу ҳақда 31 март куни Ўзбекистоннинг АҚШдаги элчиси Жавлон Ваҳобов ва АҚШ Давлат департаменти вакиллари билан ўтказилган видеоконференцияда маълум қилинган. Унда Ўзбекистонга коронавирус инфекциясига қарши курашишда молиявий ва техник кўмак кўрсатиш дастурларини кенгайтириш масалалари муҳокама қилинган.
Қайд этилишича, Ўзбекистонга бериладиган 848 минг доллар АҚШнинг халқаро ривожланиш агентлиги (USAID) дастури асосидаги навбатдаги транш бўлиб, Қизил Хоч ва Қизил Яримой жамиятлари халқаро федерациясига ва Жаҳон соғлиқни сақлаш ташкилотига COVID-19 га қарши курашишни қўллаб-қувватлаш учун берилади.
Бу маблағлар кенг миқёсли тестдан ўтказиш учун лабораторияларни жиҳозлаш, коронавирус устидан эпидемологик назоратни яхшилаш, инфекцияни профилактика қилиш ва тарқалишини назорат қилишни таъминлашда тиббиёт муассасаларининг салоҳиятини ошириш, тезкор ёрдам кўрсатиш тизими, зарарланган ҳолатларни аниқлаш ва даволаш, шунингдек, вирус ҳақидаги дезинформацияга қарши туришга йўналтирилади.
Февраль ойининг охирида АҚШ Ўзбекистонга коронавирус тарқалганда ишлатилиши учун мўлжалланган 600 комплект шахсий ҳимоя воситаларини етказиб берган эди. 17 март куни АҚШнинг Ўзбекистондаги элчихонаси коронавирус тарқалишига тайёргарлик кўриши учун Ўзбекистон Санитария-эпидемиологик осойишталик агентлигига иккинчи хайрия ёрдами сифатида шахсий ҳимоя воситаларини топширганди. 2 апрель куни эса USAID Ўзбекистонга COVID-19 коронавирусига қарши курашда қўшимча кўмак бериши маълум қилинганди.
Изоҳ (0)