Россия президенти Владимир Путин коронавирус сабабли мамлакатда жорий қилинган ишланмайдиган кунларнинг узайтирилишини маълум қилди. Россия аҳолисига 2 апрель куни телевидение орқали мурожаат қилган Путин 30 апрелгача барча кунлар ишланмайдиган кун бўлишини айтди. Бу ҳақда «РБК» хабар берди.
Путиннинг сўзларига кўра, агар вазият имкон берса, ишланмайдиган кунлар сони қисқартирилиши мумкин.
Бундан аввал Путин 25 март куни Россия аҳолисига телевидение орқали мурожаат қилган. Коронавирус инфекциясининг тарқалишига қарши курашга бағишланган нутқида президент 30 мартдан 5 апрелгача бир ҳафта ишланмаслигини эълон қилганди. Бундай кунларда корхоналар ишчиларининг иш ҳақини сақлаши керак эди, ишланмаган кунлар эса йиллик таътилга киритилмаслиги белгиланган. Бироқ бир қатор тоифадаги ишчилар ишини давом эттирган, ташкилотларнинг катта қисми масофадан ишлашни бошлаган.
HeadHunter хизмати томонидан 30 март куни эълон қилинган маълумотларга кўра, россияликларнинг 64 фоизи ушбу ҳафтада ишлашни давом эттиради. Қолганлари буни турли сабабларга кўра амалга оширмайди — баъзи иш берувчилар ходимларини дам олишга юборган, баъзилари эса инқироз сабабли ходимлар сонини қисқартирган.
Путин билан 1 апрель куни бўлиб ўтган масофавий учрашувда мамлакат бош вазири ўринбосари Татяна Голикова ишланмайдиган муддатни узайтириш бўйича таклиф билан чиққан. Президентнинг ўзи ушбу йиғилишда COVID-19 нинг Россияда тарқалиши билан боғлиқ вазият мураккаблашаётганини айтган. 2 апрель куни инфекцияга қарши кураш бўйича тезкор штаб мамлакатда яна 771 та янги ҳолат аниқланганлигини маълум қилди.
Шунингдек, 25 март куни қилинган мурожаатда Путин янги солиқларни жорий қилишни, хусусан, банклардаги омонатлардан келадиган фоизлар бўйича даромадларни ва чет элга олиб чиқиб кетиладиган дивидендларни солиққа тортишни таклиф қилган.
Путиннинг 2 апрель куни коронавирус юзасидан яна бир марта россияликларга мурожаат қилиши ҳақида аввалроқ хабар берилган эди.
Изоҳ (0)