Ўзбекистонда коронавирус инфекциясини юқтириб олган шахслар сони 187 нафарга етди. Соғлиқни сақлаш вазирлигидан маълум қилишларича, касалланганлар сони сўнгги ахборот берилганидан сўнг яна олти кишига кўпайган.
Санитария-эпидемиология назорати давлат инспекцияси бошлиғи Нурмат Отабеков «Ўзбекистон 24» телеканали орқали чиқишида Тошкентдаги Вирусология илмий-текшириш институти клиникасида даволанаётган 90 беморнинг 23 нафарида пневмония (ўпка яллиғланиши) ҳолати кузатилаётганини маълум қилди.
Ҳукумат вакилининг қўшимча қилишича, беш нафар беморнинг аҳволи оғир, улардан икки нафарининг аҳволи эса нисбатан оғирроқ деб баҳоланмоқда.
Аввалроқ Ўзбекистонда коронавирусга чалинган беморларнинг 12 нафари соғайиб, реабилитация марказларига ўтказилгани, яна 10 нафар бемор яқин вақт ичида соғайиши кутилаётгани ҳақида хабар берилган эди. Мамлакатда илк коронавирус ҳолати аниқланганидан буён ҳозирга қадар икки киши унинг қурбонига айланди.
Изоҳ (0)