Фарғона Давлат хизматлари маркази 372 та шахсий автомобилга махсус рухсатнома берди. Бу ҳақда «Дарё» мухбири хабар бермоқда.
Марказга 2020 йил 1 апрель соат 18:00 га қадар фуқаролар ва тадбиркорлик субъектларидан шахсий автомобилда ҳаракатланиш рухсатномасини олиш учун 10 мингта ариза келиб тушган. Кўриб чиқилган аризаларнинг 581 таси рад этилган. Қолган аризалар белгиланган тартибда ўрганиб чиқилмоқда.
ДХА мутахассисининг қайд этишича, 30 дан ортиқ ариза қимматбаҳо маркадаги автомашина эгалари томонидан тақдим этилгани ва етарли асосга эга эмаслиги учун рад этилган. Шунингдек, стикер олиш тоифаларига мос келмаганлар томонидан аризалар юборилиши, белгиланган ҳужжатларни тўлиқ тақдим этмаслик ҳолатлари ҳам рад жавоби берилишига асос бўлмоқда.
Эслатиб ўтамиз, республика махсус комиссияси қарорига кўра, 2020 йил 30 мартдан 20 апрелга қадар вилоятлараро, Тошкент ва Нукус шаҳарлари ҳамда вилоятлар марказларида автотранспорт воситалари давлат хизматлари марказлари томонидан бериладиган махсус рухсатнома (стикер)лар асосида ҳаракатланиши мумкинлиги белгиланганди.
Шундан сўнг ДХА директори BMW Х7 ва Mercedes’ларига рухсат олишга ариза бераётган «уддабурон»ларга мурожаат билан чиқди. Ва машина ҳайдаш учун махсус рухсатномага асоссиз эга бўлмоқчи бўлган «қаҳрамонлар» жамоатчиликка ошкор этилиши таъкидланди.
Махсус рухсатнома ёки тегишли ваколатга эга бўлмай, чеклов ўрнатилган ҳудудида машина бошқариб кетаётган ҳайдовчиларга нисбатан махсус рейдлар бошланди.
Таъкидлаш жоиз, автомашинада ҳаракатланиш ҳуқуқини берувчи ушбу махсус рухсатномани қалбакилаштириш, уни сотиш, қалбаки эканлигини била туриб ундан фойдаланиш Жиноят кодексининг 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) га асосан жавобгарликка асос бўлади.
Мавзуга доир:
Изоҳ (0)