Facebook ва Instagram ижтимоий тармоқлари коронавирус тарқалишига қарши чораларга кўр-кўрона амал қилмаётган Бразилия президенти Жаир Болсонарунинг видеоларини дезинформация сабабли ўчириб ташлади. Бу ҳақда Folha de São Paulo нашри хабар бермоқда.
Фото: AFP
«РИА Новости»нинг ёзишича, якшанба куни президент Twitter’га бир нечта видео жойлаштирган бўлиб, унда Бразилия Соғлиқни сақлаш вазирлиги томонидан тавсия этилган ижтимоий масофаланиш қоидаларига намойишкорона риоя қилмаган. Бразилия пойтахти кўчаларида ўз тарафдорлари билан яқин туриб гаплашган ва иқтисодиётнинг қулашига йўл қўймаслик учун карантинга кетмасдан ишлашда давом этишга чақирган. Кейинчалик бу хабар Twitter’дан ўчириб ташланган.
«Биз Facebook ва Instagram’дан дезинформацияга йўл қўймайдиган жамиятимиз нормаларини бузадиган, одамларга ҳақиқий зарар етказиши мумкин бўлган контентни ўчириб ташладик», — дейилади Facebook хабарида.
Болсонару пандемия бошланганидан буён иқтисодиёт учун жиддий таҳдид, деб бир неча бор карантинга қарши чиққан. Унинг фикри штатлар ва шаҳарларда мустақил равишда қатъий карантин чораларини жорий этаётган бир қатор губернаторлар қарашларига зиддир. Мухолифот коронавирус билан боғлиқ вазиятни жиддий қабул қилишдан бош тортган президентнинг истеъфосини талаб қилган.
Бразилия Соғлиқни сақлаш вазирлигининг 30 март кунги маълумотларига кўра, мамлакатда 4 256 киши коронавирусга чалинган, 136 киши вафот этган.
ЖССТ маълумотларига кўра, дунёда коронавирусга чалинганлар сони 690 минг кишидан ошиб кетди, 33 мингдан ортиқ одам вафот этди. Ўзбекистонда эса коронавирусга чалинганлар сони 158 нафарга етди.
