Давлат солиқ қўмитаси мусодара қилинган 718,8 миллион сўмлик тиббий ниқобларни Соғлиқни сақлаш вазирлигига топширди. Бу ҳақда қўмита матбуот хизмати хабар берди.
Маълум қилинишича, карантин даврида давлат солиқ хизмати органлари тадбиркорлар томонидан тиббий ниқобларни ноқонуний сотиш бўйича 81 та ҳолатни аниқлаган, тадбирлар давомида жами 718,8 миллион сўмлик 216 690 дона тиббиёт ниқоби масаласи қонуний ҳал бўлгунга қадар вақтинча олиб қўйилганди.
Аввалроқ, Тошкент шаҳар давлат солиқ хизмати органлари ходимлари 17—19 март кунлари 123 431 дона, умумий қиймати 311,2 минг сўмлик ҳеч қандай сифат сертификатига эга бўлмаган тиббий ниқоб ноқонуний савдога қўйилганлигини аниқлагани ҳақида хабар берилганди.
Ўзбекистон Президенти томонидан 2020 йил 26 мартда имзоланган қонунга асосан, Маъмурий жавобгарлик тўғрисидаги кодексга ўзгартиш ва қўшимчалар киритилди.Ушбу кодекснинг 54-моддасига киритилган ўзгартиришларга кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг беш бараваригача (27 март ҳолатига кўра, 1 115 000 сўм) миқдорда жарима солишга сабаб бўлади.
Сўнгги маълумотларга кўра, Ўзбекистонда коронавирус инфекцияси билан касалланганлар сони 104 нафарни ташкил этмоқда.
Изоҳ (0)