Абу-Даби валиаҳд шаҳзодаси Муҳаммад ибн Зайд 27 март куни Сурия президенти Башар Асад билан телефон орқали мулоқот қилди ва БАА коронавирусга қарши курашишда ёрдам кўрсатишга ваъда берди, деб хабар бермоқда «РИА Новости».
«Сурия президенти Башар Асад билан коронавирус тарқалишининг оқибатларини муҳокама қилдим ва унга БАА ушбу фавқулодда ҳолатда қардош Сурия халқига ёрдам беришга тайёрлигини билдирдим. Офатлар пайтида умуминсоний ҳамдардлик барча нарсадан устундир ва қардош Сурия бу оғир шароитда ёлғиз қолмайди», — деб ёзган Муҳаммад Ибн Зайд ўзининг Twitter’даги саҳифасида.
Эслатиб ўтамиз, 2018 йилнинг декабрь ойида БАА Форс кўрфази мамлакатларидан биринчилардан бўлиб Сурия билан дипломатик алоқаларни тиклаган эди ва Суриядаги сиёсий инқироз сабабли мамлакатда 2012 йилдан ёпилган элчихонасини қайта очган.
Бугунгача Сурия ҳукумати томонидан мамлакатда расман коронавирус билан касалланган беморларнинг аниқлангани юзасидан хабарлар берилмаган.
Февраль ойидан буён барча чегара постлари, портлар ва халқаро аэропортда махсус тайёргарликка эга шифокорлардан иборат гуруҳ ишламоқда. Уларнинг асосий вазифаси мамлакат ҳудудига келган одамларни коронавирусга текшириш ва инфекция аниқланган тақдирда зарур чора-тадбирларни амалга оширишдан иборат.
Аввалроқ ЖССТ коронавирус пандемиясининг тарқалиши тезлашганини маълум қилганди. АҚШда коронавирус билан касалланганлар сони 100 минг кишидан ошиб кетди, Италияда коронавирус оқибатидаги ўлимлар сони бўйича кунлик антирекорд янгиланди — бир суткада 969 бемор вафот этди. Ўзбекистонда эса коронавирус билан касалланганлар сони 104 кишига етди.
Изоҳ (0)