Тошкентда иситиш мавсуми 1 апрелдан тўхтатилади. Бу ҳақда Тошкент шаҳар ҳокимлиги хабар берди.
«Жорий йилнинг 1 апрель кунидан бошлаб ҳаво ҳароратининг кўтарилиши муносабати билан Тошкент шаҳрида иситиш тизимини режа асосида навбатма-навбат ўчириш буйича ишлар олиб борилишини маълум қиламиз», — дейилади ҳокимлик ахборотида.
Айни вақтда, ҳокимликдан қўшимча қилишларича, иссиқ сув таъминоти ўчирилмайди ҳамда узлуксиз ва сифатли таъминланишига барча чоралар кўрилади.
Аввалроқ, Ўзбекистонда коронавирусга чалиниш билан боғлиқ илк ҳолат аниқлангач, шаҳар ҳокимлиги иситиш ва иссиқ сув таъминотини ўчириш жадвали қайта кўриби чиқилиб, кейинга қолдирилгани маълум қилинган эди.
Мавзуга доир: «Карантин пайтида коммунал хизматлар тўловида имтиёзлар бериладими?» Уй-жой ва коммунал хизмат кўрсатиш вазирлиги жавоб берди
Авваллари Тошкентда ҳар йили кузда — иссиқлик таъминоти ишга туширилиши арафасида ва баҳорда — иссиқлик таъминоти ўчирилиши олдидан иссиқ сув таъминоти ҳам салкам бир ҳафтага тўхтатилар, иссиқ сувсиз қоладиган маҳалла ва мавзеларнинг рўйхати олдиндан эълон қилинар эди.
Маълумот учун, 28 март Тошкент вақти билан 20:00 ҳолатига кўра, Ўзбекистонда коронавирусга чалиниш билан боғлиқ 104 та ҳолат қайд этилган. Ҳозиргача икки бемор вафот этган — улардан бири Наманганда истиқомат қилган 72 ёшли онахон, иккинчиси Тошкентда яшаган 39 ёшли шифокор эркак.
