Коронавирус инфекцияси тарқалишига қарши курашиш мақсадида инсонларнинг ҳаракатланишига айрим чекловлар киритилганлиги натижасида, аввало, аҳолининг эҳтиёжманд қатлами, яъни кам таъминланган оилалар, ёлғиз кексалар, ногиронлиги бор шахслар ва ишсиз фуқароларни зарурий маҳсулотлар билан таъминлаш эҳтиёжи ортмоқда.
Адлия вазирлиги жамоатчилик билан алоқалар бўлимининг «Дарё»га маълум қилишича, бундай шароитда Шодиев халқаро фонди ҳукумат томонидан олиб борилаётган чора-тадбирларга ўзининг ҳиссасини қўшишга ва дастлабки босқичда аҳолининг кам таъминланган қатламига моддий кўмак беришга тайёрлигини билдирди.
Олиб борилган ўрганишлар натижасида Адлия вазирлиги, Шодиев халқаро фондининг Ўзбекистондаги ваколатхонаси ва «Мадад» нодавлат нотижорат ташкилотлари томонидан республика бўйича 1 500 дан ортиқ ёрдамга муҳтож оилалар аниқланди. Фонднинг ёрдами билан жами 13 турдаги бирламчи озиқ-овқат маҳсулотлари ва тиббиёт воситаларини ўз ичига олган ижтимоий ёрдам тўпламлари шакллантирилди.
Мазкур ижтимоий ёрдам тўпламлари ортилган автомобиллар республиканинг олис ҳудудларида яшовчи эгаларига етказилади. Уларни топшириш пайтида ҳудудий адлия органлари ва «Мадад» нодавлат нотижорат ташкилотининг жойлардаги филиаллари томонидан уларга ҳуқуқий тушунтиришлар берилади.
Маълумот учун, аҳолини ижтимоий муҳофаза қилиш ва қўллаб-қувватлаш мақсадида Адлия вазирлиги 2018 йилдан бери «Биз биргамиз» ижтимоий лойиҳасини йўлга қўйган. Лойиҳа доирасида аҳолининг заиф қатламларига ижтимоий ва иқтисодий кўмак беришга алоҳида эътибор қаратиб келинмоқда.
Эслатиб ўтамиз, Ўзбекистонда коронавирусга чалинганлар сони 104 нафарга етди. Яна бир бемор вафот этди.
Изоҳ (0)