Отабек Умаров Ўзбекистонга ижтимоий ёрдам жўнатган БАА ҳукуматига миннатдорлик билдирди

Шавкат Мирзиёевнинг кенжа куёви, Ўзбекистон MMA ассоциацияси, Триатлон федерацияси раиси, Ўрта Осиё MMA конфедерацияси раҳбари Отабек Умаров Instagram’даги саҳифасида Бирлашган Араб Амирликлари ҳукуматига Ўзбекистон халқига кўрсатган гуманитар ёрдами учун миннатдорлик билдирди.

Умаров БАА томонидан юборилган ижтимоий ёрдамларнинг аэропортда қабул қилиб олиниши акс этган фотосуратларни ҳам ўз саҳифасига юклаган.

Бирлашган Араб Амирликлари ҳукуматига пандемияга қарши курашда Ўзбекистон халқига кўрсатган ёрдами учун миннатдорлик изҳор этаман! Бугун 8 тоннадан ортиқ гуманитар ёрдам махсус рейс билан Тошкент аэропортига олиб келинди. Тиббий ниқоблар, қўлқоплар, ҳимоя костюмлари ва бошқа воситалар бизга COVID-19 ҳужумига қарши туришга ёрдам беради. Биз бу оғир дамларда ёлғиз эмаслигимизни билишдан мамнунмиз ва айниқса, мамлакатингиз олд қаторларда коронавирусга қарши кураш олиб бораётган бир пайтда бизни ҳам қўллаб-қувватлаётганингизни қадрлаймиз. Сизга эгилиб таъзим қиламиз, ватандошларимнинг дуолари ушбу синов пайтида сизни ва яқинларингизни ҳимоя қилсин!

Отабек Умаров, Ўзбекистон MMA ассоциацияси, Триатлон федерацияси раиси, Ўрта Осиё MMA конфедерацияси раҳбари

27 март соат 20:00 ҳолатига кўра, Ўзбекистонда коронавирусга чалинганлар сони 88 нафарга етган, республикада жамоат жойларида ниқоб тақмаган 178 киши 61,8 миллион сўм жаримага тортилган. Ўзбекистонда ўта заруратсиз уйдан чиқиш ва кўчада 3 нафардан ортиқ бўлиб тўпланиш тақиқланган.